Он гарсаар эрчимтэй өсөж байсан ам.долларын ханш 1948 төгрөгт хүрлээ. Тодруулбал арилжааны банкуудын зарж байгаа долларын ханш 1944-1948 төгрөгийн хооронд байгаа бол “Найман шарга” зах дээр 1945 төгрөг байна.Харин өчигдөр үдээс өмнө  арилжааны банкууд нэг ам.долларыг 1936-1945 төгрөгөөр  зарж, “Найман шарга” зах дээр ам.долларын ханш 1939 төгрөгтэй тэнцэж байсан билээ. Гэвч үдээс хойш өсөж 1948 төгрөгт хүрсэн байна.  

2015 онд манай улсад гадаадын шууд хөрөнгө оруулалт нэмэгдэж, эрдэс баялгийн экспорт өсөхгүй бол долларын ханш 2000 хүрнэ гэсэн тооцоог эдийн засагчид гаргаад байгаа. Энэ оны төсөвт ам.долларын ханшийг 1800 төгрөгөөр бодож суулгасан. Гэтэл доллар ханшийн хамгийн идэвх муутай үедээ 1948 хүрээд байгаа нь хаврын бүтээн байгуулалт эхлэх үед “ тэнгэрт хадах” вий гэсэн болгоомжлол байна.

Нөгөөтэйгүүр ирэх сард  ам.долларын ханш 2000 төгрөгт  хүрч магадгүй гэх болгоомжлол иргэдийн дунд бий боллоо.Учир нь хоёрдугаар сар бол Монголчууд бидний өргөн дэлгэр тэмдэглэн өнгөрүүлдэг цагаан сарын баяр болдог учир юм юмны үнэ өсдөг билээ. Тэгэхээр он гараад удаагүй байхад ийн хурдтай дээшилж буй ам.доллар энэ эрчээрээ явбал хоёрдугаар сард 2000 хүрч магадгүй юм.