Монголын хөрөнгийн  биржээс энэ сарын 6,7-нд  нээлттэй хаалганы өдөрлөг зохион байгуулахаар болсон байна.  Уг нээлттэй өдөрлөгт  “Санхүүгийн зохицуулах хороо”, "Монголын хөрөнгийн бирж" , "Үнэт цаасны төлбөр, тооцоо, төвлөрсөн хадгаламжийн төв", Үнэт цаасны арилжаа эрхлэгчдийн холбоо, Брокер, дилерийн компаниуд оролцох аж.

Манай улсын иргэдийн үнэт цаасны мэдлэг цэнхэр, ягаан тасалбараар хязгаарлагддаг гэдэг. Харин өндөр хөгжилтэй орнуудад зөвхөн томоохон хөрөнгө оруулагчид бус жирийн иргэд ч хөрөнгийн зах зээлийн идэвхтэй тоглогч болсон байдаг. Тэгвэл энэ боломжоор Монголчууд хангагдах гарц нээлттэй байгаатай холбогдуулан тус өдөрлөгийн хүрээнд ард иргэдэд сонирхсон асуултад мэдээлэл өгөх юм байна.

Нээлттэй өдөрлөгийн үеэр Монголын хөрөнгийн зах зээл, хөрөнгийн бирж болон бусад зах зээлд оролцогч мэргэжлийн болон удирдах байгууллагуудын үйл ажиллагаа, үүрэг хариуцлага болон бүтэц зохион байгуулалтын талаар ард, иргэд болон хөрөнгө оруулагчдад нэгдсэн ойлголт өгөх, Иргэдийн дансыг шүүж холбогдох ногдол ашиг болон харьяа брокерийн пүүсийн талаар мэдээлэл өгөх, Ард, иргэдэд нэг цэгийн үйлчилгээ үзүүлж, брокерийн болон төлбөр тооцооны дансуудыг түргэн шуурхай нээж, зөвлөгөө өгч үйлчлэхээс гадна хувьцаатай холбоотой ард иргэдийн гомдол, саналыг бүртгэх, холбогдох мэдээллийг өгөх юм байна.

Мөн 1990 онд гаргаж байсан цэнхэр, ягаан тасалбарын талаар иргэдэд тодорхой ойлголт өгч, иргэдийн нэр дээр уг тасалбар байгаа эсэхийг шалгаж ямар нэгэн ойлгомжгүй зүйл байвал гомдол гаргах боломжтой гэдгийг албаныхан хэллээ. Тодруулбал цэнхэр, ягаан тасалбарыг нь зөвшөөрөлгүйгээр авсан бол гомдол гаргах боломжтой юм байна. Үүнээс гадна  1072 хувьцааны талаарх мэдээллийг ч мөн иргэдэд өгөх юм байна.

Дашрамд дуулгахад иргэдийн нэр дээр хувьцааны данс нээж, бичилтийг нь хийж дууссан байна. Тиймээс иргэд “Үнэт цаасны төлбөр, тооцоо, төвлөрсөн хадгаламжийн төв”-ийн цахим сайтад хандаж өөрийн нэр дээрх хувьцааны дансаа шалгах боломжтой аж.