Чингисийн хөрөг зураг бүхий Богдхан уулыг хамгаалахаар нэгдсэн иргэд өчигдөр мэдээлэл өгөв. Тэд Чингисийн хөрөг зурагны толгой, мөр хэсэгт хашаа хатгаж, шороог нь ухаж Туул гол руу асгаж байгааг эсэргүүцэж байгаа гэнэ. Аялал жуулчлалын зориулалтаар гэж авсан УИХ-ын гишүүн асан О. Гүндалайгийн эгчийн хүүхэд О.Одсүрэн тус ууланд ийнхүү хашаа хатгасан гэв. Анх долоон га газрын зөвшөөрөл авсан бол дахин сунгахдаа гурван айлын газрыг булаан орон гэргүй болгосон гэнэ. Энэ талаар “Далд иргэн” хүний эрхийн байгууллагийн тэргүүн Б.Жагаа “О.Одсүрэн долоон га газрыг хууль зөрчиж аваад хоёр га газрыг нь өөр компанид зарсан. Зайсан толгой болон Чингисийн хөрөгтэй ууланд нэг газрын гэрчилгээ үзүүлдэг. Дархан цаазат газрын хуулинд газар эзэмшиж байгаа иргэн газраа шилжүүлж зарахыг хориглоно гэж заасан байдаг. Мөн О.Гүндалай иргэдийг цагийн 50 мянган төгрөгөөр бөхчүүдийг хөлсөлж дарамтлуулдаг” гэв. Мөн хашаа хатгахыг эсэргүүцсэн хүмүүсээс дөрвийг нь шүүхэд дуудаж, цагдаа нар байцааж байгааг хэлэв.
Г.ЦЭВЭЛМАА
ЗУУНЫ МЭДЭЭ