Хэлний бодлогын үндэсний зөвлөлийн даргаар Л.Гантөмөрийг томиллоо
Монгол хэлний тухай хуулийг 2015 оны 2 дугаар сарын 12-ны өдөр Улсын Их Хурлаар хэлэлцэн баталсан билээ. Уг хуулийн 6 дугаар бүлэг, 21 дүгээр зүйлд Монгол Улсын Ерөнхийлөгчийн дэргэд Хэлний бодлогын үндэсний зөвлөл ажиллахаар заасан болно.

Монгол Улсын Ерөнхийлөгч Цахиагийн Элбэгдорж 2015 оны 7 дугаар сарын 6-ны өдөр Хэлний бодлогын үндэсний зөвлөл байгуулах тухай 133 дугаар зарлиг гаргаж, бүрэлдэхүүнийг баталлаа.

Хэлний бодлогын үндэсний зөвлөлийн анхдугаар хуралдаан өнөөдөр Ерөнхийлөгчийн Тамгын газрын даргын өрөөнд боллоо. Ерөнхийлөгчийн Тамгын газрын дарга П.Цагаан хурлыг нээж хэлсэн үгэндээ “Монгол Улсын Ерөнхийлөгч Ц.Элбэгдорж бодлого, үйл ажиллагааны хөтөлбөрийнхөө хүрээнд монгол хэл, түүх соёлынхоо тухай 3 томоохон ажлыг хийж хэрэгжүүлж байгааг товчхон танилцуулъя.

Нэгдүгээрт, түүхээ бүтэн болгох, үнэнээр нь танин мэдэхэд чиглэсэн “Монголын эх түүх” долоон ботийг эрхлэн гаргалаа. Хоёрдугаарт, дэлхийн хаанаас ч монгол хэл сурах, судлахад чиглэсэн монгол хэлний онлайн хөтөлбөрийг боловсруулж байна. Гуравдугаарт, мөн “Монгол хэлний их тайлбар толь” www.mongoltoli.mn цахим хуудсыг бүтээлээ. Энэ толийн нээлт 2015 оны 12 дугаар сарын 27-нд болно. Дараагийн нэг том хариуцлага, үүрэг бол Монгол хэлний тухай хууль батлагдаж, энэ сарын 1-ний өдрөөс мөрдөгдөж эхэлснээр Ерөнхийлөгчийн дэргэд Хэлний бодлогын үндэсний зөвлөл ажиллах болж буй явдал юм” хэмээгээд цаашдын үйл ажиллагаанд амжилт хүсэж, Ерөнхийлөгчийн Тамгын газрын зүгээс бүхий л талаар дэмжиж ажиллахаа мэдэгдлээ.

Хурлаар хуульд заасны дагуу зөвлөлийн орон тооны ажлын алба байгуулах тухай болон хуулиар хүлээсэн 12 зүйл үүргийг хэрэгжүүлэх ажлын төлөвлөгөө батлах тухай хэлэлцлээ. Зөвлөлийн ээлжит хурлыг Хэлний бодлогын үндэсний зөвлөлийн дарга, Боловсрол, Соёл, Шинжлэх ухааны сайд Л.Гантөмөр ирэх сарын дундуур зарлан хуралдуулна. Ийнхүү Монгол Улсын Ерөнхийлөгчийн дэргэд монгол хэлийг хамгаалах, хөгжүүлэх үндсэн үүрэг бүхий Хэлний бодлогын үндэсний зөвлөл ажиллаж эхэллээ.
Г.Уянга
olloo.mn
Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.