Иргэний нийгмийн байгууллагууд нэгдэж “Хүслээ нэгтгэе” Үндэсний хөдөлгөөн байгуулах болсон тухайгаа өнөөдөр Үндэсний мэдээллийн төвд хийсэн хэвлэлийн бага хурлаараа мэдэгдлээ.
Эл хөдөлгөөнийг байгуулах хурал энэ сарын 28-ны бямба гарагт Засгийн газрын 11 дүгээр байрны хурлын зааланд болох аж. Тус хөдөлгөөн нь эх орондоо үнэнч шударга амьдрах, хүн бүрийн хүслийг нэгтгэх, төрийн үйл ажиллагаанд үнэлэлт дүгнэлт өгөх, иргэний хяналтын тогтолцоог бүрдүүлэхийн төлөө бүх нийтийн хүсэл зорилгыг нэгтгэх гэнэ. Мөн эх орон, газар шороо, эрх чөлөөг минь үгүй хийхээр үгсэн хуйвалдсан улс төрчид, бизнесийн компаниуд, төрийн үйл ажиллагаагаар халхавчилсан хүмүүсийн эсрэг тэмцэнэ гэлээ.
“Иргэдийн шударга шүүх” ТББ-ын тэргүүн Х.Бат-Ялалт “Монголчуудын эрх ашгийн төлөө бид тэмцээд төрийн өмнө хүчин мөхөсдөж байна. Тиймээс бүгд нэгэн дуу хоолойгоор нэгдэх үүднээс уг хөдөлгөөнийг байгуулсан. “Хүслээ нэгтгэе” үндэсний хөдөлгөөнд албан ёсоор 15 байгууллага нэгдээд байна. Мөн нэгдэхээр хүслээ илэрхийлж байгаа маш олон байгууллага хувь хүн байгаа. Төрд шинэчлэл өөрчлөлт хийх хэрэгтэй байна. Төрийн эрх мэдлийг урвуулан хувьдаа ашигладаг хүмүүс цөөнгүй бий. Төрийн албан хаагчид үгсэн хуйвалдан бүлэглэл бий болгочихжээ. Энэ бүхэн төрийн хар хайрцагны бодлого байхгүй болсонтой холбоотой. Тиймээс энэ бүхнийг залруулахын төлөө иргэний хөдөлгөөнүүд нэгдлээ” хэмээв.
Г.Уянга
оллоо.мн