Сүүлийн үед хүүхдийн мөнгийг зорилтот бүлгийн хүүхдүүдэд олгох болсонтой холбогдуулан өрхийн амьжиргааны түвшинг хэрхэн яаж тогтоосныг асууж, сураглах хүн олон байна. Тэд хорооны ажилчдыг буруу тогтоосноос болж хүүхдийн мөнгөө авч чадахгүй боллоо хэмээн бухимдаж байгаа юм.
Тэгвэл өрхийн амьжиргааны түвшин тогтоох судалгааг зөвхөн хүүхдийн мөнгө олгоход ашиглахгүй тул иргэдийг уг судалгаанд анхаарал, болгоомжтой хандахыг албаныхан зөвлөж байна. Тодруулбал Хөдөлмөр, нийгмийн хамгааллын яамны “Хүнс тэжээл нийгмийн халамжийн нэмэлт санхүүжилт” төслийн зорилтот хүрээг тодорхойлох үндэсний зөвлөх Р.Олонбаяр хэлэхдээ “Амьжиргааны төвшний судалгааг зөвхөн хүүхдийн мөнгөнд ашиглахгүй. Цаашид яллагдагч этгээдэд хуульзүйн өмгөөллийн үйлчилгээ үзүүлэх, хүнсний эрхийн бичиг олголт, орон сууцжуулах хөтөлбөр, Монголбанкнаас тодорхой зээлийн хөтөлбөр, залуу өрхөд чиглэсэн жижиг дунд бизнесийн зээлийн хөтөлбөрүүдэд ашиглахаар тооцоо судалгаа хийж байна” гэлээ.
Өрхийн амьжиргааны төвшнийг гурван жил тутамд нэг шинэчилдэг бөгөөд 2013-2015 оны судалгаагаар энэ удаагийн хүүхдийн мөнгийг олгож байгаа аж. Одоо өрхийн амьжиргааны судалгааг дахин шинэчлэхээр ажиллаж байгааг албаныхан дуулгалаа.
Б.Сансар
olloo.mn