Дэлхийн бөмбөрцөгт амьдарч буй долоон тэрбум хүний дотроос хамгийн баян эрхмийг бид Билл Гэйтс л гэж боддог. Тэгвэл энэ ойлголт буруу бололтой. Тодруулбал, дэлхийн хамгийн нөлөө бүхий, хүчирхэг хүнээр жил дараалан тодрох ОХУ-ын Ерөнхийлөгч В.Путин энэ хорвоогийн хамгийн баян хүн хэмээн нэгэн эксперт дүгнэсэн байх юм. Тэдний үзэж буйгаар Ерөнхийлөгч эрийн нийт хөрөнгө 200 тэрбум ам.доллар гэнэ.
АНУ-ын Эдийн засгийн Форбес сэтгүүл албан ёсоор дэлхийн хамгийн баян эрхмийг Майкрософт компанийг үндэслэгч Билл Гэйтс хэмээн тодорхойлж, нийт хөрөнгийнх нь үнэлгээг 75 тэрбум ам.доллар гэж мэдээлсэн. Тэгвэл бүхэл бүтэн 20 орчим жил хүч нөлөөгөө хадгалсаар байгаа В.Путин хэмжээлшгүй их хөрөнгөтэй байж магадгүй бололтой. Эдүгээ 64 настай В.Путины нийт хөрөнгийг 2007 онд улстөрийн шинжээч Станслав Белковский 40 тэрбум ам.доллар гэж үнэлсэн байдаг. Тэгвэл ОХУ-ын хөрөнгө оруулалтын сангийн менежер асан, зохиолч Билл Броудер түүний хөрөнгийг маш их хэмээн тодорхойлж, 200 тэрбум ам.доллароос дээш гэж үнэлжээ.
Станслав Белковскийгийн хэлж буйгаар Путины хөрөнгө ихэнх нь газрын тосны бизнесээс бүрддэг аж. Түүний дүгнэснээр, “Сургутнефтегаз” компанийн хувьцааны 37 хувь, Газпром компанийн 4.5 хувь, Гунвор зэрэг компаниас ашиг хүртдэг гэнэ. Гэхдээ Гунвор компани энэ талаархи мэдээллийг эрс үгүйсгэсэн юм.
Харин эдүгээ тэрбээр В.Путины хөрөнгийг 70 тэрбум ам.доллар гэж үнэлсэн. Ингэхдээ гадаад, дотоодын корпорациудаас илүү их мэдээлэл цуглуулж, гаргажээ. Үүгээр тооцсон ч, В.Путин дэлхийн хамгийн баян 10 хүний жагсаалтын хоёрт эрэмбэлэгдэх юм. Тэгвэл түүний хувийн эд хэрэглэлээс сонирхож үзье. В.Путин 35 сая ам.долларын үнэ бүхий “Олимпиа” нэртэй дарвуулт хөлөг онгоцтой. Гэхдээ энэ онгоцыг Челси клубын эзэн Роман Абрамович түүнийг Ерөнхийлөгч болсных нь дараа өгсөн гэх мэдээлэл ч бий.
Мөн өөрийгөө Оросын бизнесмэн гэж танилцуулсан Сергей Колесников гэгч Би Би Си-д В.Путинд зориулан хувийн харш барьж, түүнд зарцуулагдах хөрөнгийг Оросын олигархиудын байгуулсан нууц сангаас гаргасан гэж ярьжээ. Үүнээс гарна ОХУ-ын төрийн тэргүүний улстөрийн өрсөлдөгчдийнх нь нэг хөрөнгийнх нь талаар бичихдээ 58 нисэх онгоц, нисдэг тэрэгтэй, 500 мянган ам.долларын цагны цуглуулга, 20 харштай гэж бичсэн байдаг байна.
Монголын мэдээ
Б.Даваахүү
Б.Даваахүү