Монгол Улсын 2017 оны Ерөнхийлөгчийн сонгуульд нэр дэвшигчид өнөөдөр Сонгуулийн ерөний хороонд баримт бичгээ хүргэлээ.
М.ЭНХБОЛД СЕХ-НД МАТЕРИАЛАА ХҮЛЭЭЛГЭН ӨГӨВ
МАН-аас нэр дэвшигч Миеэгомбын Энхболд СЕХ-нд 09:50 цагт материалаа хүлээлгэн өглөө. Баримт бичгээ гардуулсныхаа дараа нэр дэвшигч М.Энхболд "Энэ удаагийн төрийн тэргүүний сонгууль хуулийн дагуу, хуульд нийцсэн бодлого үйл ажиллагааны шударга өрсөлдөөн байгаасай гэж хүсч байна" хэмээлээ.
Н.ЭНХБАЯР НЭР ДЭВШИХ БАРИМТ БИЧГЭЭ ХҮРГЭЛЭЭ
МАХН-аас нэр дэвшигч Монгол Улсын гурав дахь Ерөнхийлөгч Н.Энхбаяр баримт бичгээ 11:30 цагт СЕХ-ны дарга Ч.Содномцэрэнд хүлээлгэн өглөө. Үүний дараа МАХН-аас нэр дэвшигч Н.Энхбаяр “Сонгууль шударга явагдаасай. Шударга өрсөлдөөний үр дүнг ард түмэн мэднэ” гэлээ.
Х.БАТТУЛГА СЕХ-НД МАТЕРИАЛАА ХҮЛЭЭЛГЭН ӨГЛӨӨ
АН-аас нэр дэвшигч УИХ-ын гишүүн асан Х.Баттулга 11:50 цагт материалаа хүлээлгэн өглөө. Баримт бичгээ гардуулсныхаа дараа АН-аас нэр дэвшигч Х.Баттулга “Сонгууль шударга болно гэж найдаж байна” гэлээ.
Намууд холбогдох хуульд заасны дагуу нэр дэвшүүлсэн тухай хуралдааны шийдвэр, тэмдэглэл, нэр дэвшигчийн бичгээр өгсөн зөвшөөрөл, нэр дэвшигчийн хөрөнгө, орлогын мэдүүлэг, өр төлбөргүй болох тухай нэр дэвшигчийн мэдүүлэг, өр төлбөргүй болох тухайн нэр дэвшигчийн талаарх татварын болон шүүхийн шийдвэр гүйцэтгэх газрын тодорхойлолт, нэр дэвшигчийн намтар, сонгуулийн мөрийн хөтөлбөр, сүүлийн таваас доошгүй жил эх орондоо байнга оршин суусан тухай хилийн албаны тодорхойлолт, нэр дэвшүүлсэн намын дүрэм зэрэг баримт бичгийг бүрдүүлж өгчээ.
Сонгуулийн Ерөнхий Хороо нэр дэвшигчийг тус бүр бүртгэхдээ ирүүлсэн баримт бичиг үнэн зөв, гүйцэд эсэх, нэр дэвшүүлэх үйл ажиллагаа хуулийн дагуу явагдсан эсэхийг нягтлан шалгаад баримт бичгийг хүлээн авснаас хойш гурав хоногийн дотор бүртгэх эсэх асуудлыг шийдвэрлэж тогтоол гаргах юм байна.
СЕХ бүртгэсэн тухай шийдвэр гаргаснаас хойш ажлын гурав өдрийн дотор нийт нэр дэвшигчийг улсын хэмжээнд мэдээлэх юм.
Г.Зул