Зуны тэргүүн хөхөгчин могой сарын Шиний гуравны билэгт сайн өдөр буюу тавдугаар сарын 28-ны өдөр Дорнодчууд нутгийн шүтээн Хан уулаа тахив. Уул усаа тахин байгаль дэлхийгээ аргадан, ард түмнийхээ заяа буяныг даатгах уламжлалт ёс, зан үйлд аймаг, сумын удирдлагууд, ард иргэд оролцлоо.
Тахилгын эхэнд Данриг данжаалин хийдийн лам, хуврагууд ном хурж, уул овоогоо аргадсан байна. Дорнод аймгийн удирдлагууд нутгийн олноо аливаа муу бүхнээс гэтэлгэж, идээ ундаа элбэг дэлбэг, сэтгэл тэнүүн, амар амгалан байлгахыг уул уснаасаа хүсэн сүсэглэжээ.
Тахилгын үеэр уртын дуу, морин хуурын аялгуу эгшиглүүлж уул овоогоо аргадан, бөхийн барилдаан, гурван насны хурдан морьны уралдааныг зохион байгуулсан байна.
Б.Орхон