Нийслэлийн Сонгинохайрхан дүүргийн нутаг дэвсгэрт 10МВт хүчин чадалтай, газар тариалантай хосолсон МОННАРАН нарны цахилгаан станц ашиглалтад орох гэж байна.
Тус станцыг Бридж групп болон Японы Фарм дү компанийн хөрөнгө оруулалттай Эвридэй ферм компанийн захиалгаар барьж буй бөгөөд Ерөнхий гүйцэтгэгчээр Бридж Констракшн компани ажиллаж байгаа аж. Төслийн барилга угсралтын ажил үндсэндээ дууссан тул барилга байгууламжийг ашиглалтад оруулах улсын комисс энэ сарын 07-ны өдөр тус станцад ажиллажээ.
Энэхүү нарны цахилгаан станц ашиглалтад орсноор жилдээ ойролцоогоор 16.1 ГВтц байгальд ээлтэй цэвэр эрчим хүч үйлдвэрлэж нүүрс, мод түлэхийг багасгах юм байна. Тодруулбал, жилдээ 16.6 мянган тонн нүүрсний хэрэглээг хэмнэж 23,000 өрхийг сэргээгдэх эрчим хүчээр хангах боломж бүрдэх аж.
Мөн уламжлалт цахилгаан станцуудтай харьцуулбал 103.9 мянган тонн усны хэрэглээг хэмнэх бөгөөд газар тариалантай хосолсон Японы цоо шинэ технологи нэвтэрч буйгаараа онцлогтой юм байна.
Б.Орхон