Ой тогтоолтын Ази тивийн аварга шалгаруулах оюуны спортын тэмцээн өнгөрсөн амралтын өдрүүдэд Хонгконгод болж өндөрлөлөө. Тус тэмцээнд 11 орны нийт 150 гаруй тамирчин ой тогтоолтын 10 төрлөөр бага, өсвөр, насанд хүрэгчдийн ангилалд хоёр өдрийн турш оюуны өрсөлдөөнийг өрнүүлсэн юм.
Манай улсыг төлөөлж Монголын Оюун Ухааны Академийн 20 тамирчин ОУ-ын шүүгч, дасгалжуулагчийн хамт амжилттай оролцож 28 алт, 25 мөнгө, 20 хүрэл медаль буюу 90 медалийн 73 медалийг хүртэж үнэмлэхүй ялалтыг байгуулжээ.
Мөн манай тамирчдын хувьд тус гурван насны ангиллын дэлхийн зургаан дээд амжилтыг шинэчлэн тогтоосон бөгөөд нийлбэр дүнгээр илүүрхэж бүх насны ангилалдаа шилдгийн шилдэг болох эхний гурван байрыг эзэлж багаараа хошой тэргүүн байрт шалгарсан байна.
Тэмцээний 10 төрлийн дараах нийлбэр оноогоор 2016 оны Өсвөрийн дэлхийн аварга, Олон Улсын Их Мастер Н.Мөнхшүр тэргүүлж 4000 гаруй тамирчидтай Дэлхийн чансаанд 2 дугаарт эрэмбэлэгдэхээр болжээ. Тус тэмцээнд 15 гаруй жил хичээллэж буй Германы тамирчид болох дэлхийн #2 Иоханнес Маллов, #6 Симон Рейнхард нарыг ихэр тамирчид болох Н.Энхшүр, Н.Мөнхшүр нар ялж олныг гайхшруулжээ. Мөн өсвөр насанд Олон Улсын Мастер Э.Лхагвадулам, бага насанд Б.Ариунбилэг нар аваргалжэээ.
Ийнхүү Монголын оюун ухааны академийн тамирчид оюуны спортын 44 дэх тэмцээндээ амжилттай оролцож, нийт 685 медаль хүртэн дэлхийн дээд амжилтуудыг шинэчлэн тогтоосоор байна.
Б.Орхон