Эх орноосоо дүрвэн гарсан монгол иргэдэд Израильд суугаа Монголын Өргөмжит консул тусламж үзүүлжээ. Тодруулбал, Израиль Улсад дүрвэгчийн статусаар амьдарч буй Монгол Улсын хоёр иргэний дундаас төрсөн нярай хүүхдийн биеийн байдал маш муу, яаралтай хагалгаа хийлгэх шаардлагатай үед Монгол Улсаас Израиль Улсад суугаа Өргөмжит консул Ноён Ами Оркаби яаралтай тусламж үзүүлсэн байна.
Монгол эмэгтэй Зүүн Иерусалим хотын дүрвэгсдийн эмнэлэгт хүүхдээ төрүүлсэн бөгөөд нярай төрөлхийн өвчтэй төрж, улмаар яаралтай хагалгаанд орох шаардлагатай болоход Өргөмжит консул Ами Оркаби тэднийг Иерусалим хотын эмнэлэгт шилжүүлэн, шаардлагатай бүх эмчилгээний зардлыг өөрөөсөө гаргажээ. Нярай хүүхэд Шари Цедек эмнэлэгт яаралтай хагалгаанд орсон бөгөөд хагалгаа амжилттай болсон байна.