Үндэсний Статистикийн хорооноос өнөөдөр Монгол Улсын нийгэм, эдийн засгийн үзүүлэлтүүдийг 2017 оны эцсийн байдлаар танилцууллаа.
Танилцуулгад дурьдсанаар Монгол Улсын хүн ам 2017 оны эцэст урьдчилсан дүнгээр 3.2 сая болжээ. Энэ нь өмнөх оноос 59.8 мянган хүнээр буюу 1.9 хувиар өссөн үзүүлэлт юм.
Улсын хэмжээнд 2017 оны байдлаар 75,734 хүүхэд төрсөн байна. Үүний 74,328 буюу 98.1 хувь нь Монгол Улсад, 1,406 буюу 1.9 хувь нь гадаадад төржээ. 2017 онд төрсөн хүүхэд өмнөх оноос 3,648-аар, нас барсан хүн 340-өөр тус тус буурчээ гэж статистикийн тайланд дурджээ.
Дашрамд мэдээлэхэд, одоогоос гурван жилийн өмнө буюу 2015 оны нэгдүгээр сард Монгол Улс гурван сая дахь иргэнээ өлгийдөн авч байсан билээ.
Г.Зул