"Монголын Зэс" корпораци Монгол Улсын Засгийн газар "Эрдэнэт үйлдвэр" ТӨХК-ийн 49 хувийг төрд авах шийдвэр дахин гаргасныг эсэргүүцэж байгаагаа албан ёсоор илэрхийлээд байна.
Монгол Улсын Дээд шүүх 12 дугаар сард тус үйлдвэрийг нийгэмчлэхийг хориглосон шийдвэр гаргасан ч энэ сарын эхээр Засгийн газар тус үйлдвэрийн 49 хувийг хэлцэл хийж авах замаар "Эрдэнэт үйлдвэр" ТӨХК-ийн 100 хувь төрийн өмчит компани болгоно гэж зарласан. Гэсэн хэдий ч талуудын хооронд худалдах, худалдан авах хэлцэл хийгдээгүй болохын "Монголын зэс" корпораци мэдэгдээд, Засгийн газрын энэ шийдвэрийг хуулийн хүрээнд түдгэлзүүлнэ гэдгээ мэдэгдээд байна.
"Монголын Зэс" корпорацийн ТУЗ-ийн дарга Мягмарын Мөнхбаатар олон улсад тус компанийг төлөөлж буй "Омниа Стратеги" хуулийн фирмтэй уулзахаар Лондонд ирээд байхад нь "Ройтерс" агентлагаас түүнтэй уулзсан юм. Тэрээр "Бид өөрсдийн хууль ёсны өмчлөлөө дотооддоо ч олон улсад ч хамгаалах болно" гээд "Монгол Улс ОУВС-ийн Өргөтгөсөн санхүүжилтийн хөтөлбөрийн хүрээнд хүлээсэн үүргээ биелүүлэхийн тулд гадны хөрөнгө оруулагчдыг татах шаардлагатай. Гэхдээ Засгийн газрын хийж буй энэ үйлдэл нь хөрөнгө оруулагчдад сөрөг дохиог өгөөд зогсохгүй дахин давтагдах юм бол Монголыг сонирхох хөрөнгө оруулагч олдохоо болино" гэж "Ройтерс"-д мэдээллээ.
Дэлхийн уул уурхайн томоохон компани "Рио Тинто" групп Монголын Оюу толгой зэсийн ордод үйл ажиллагаа явуулж байгаа. "Оюу толгой" ХХК-ийн 34 хувийг Монгол Улсын Засгийн газар, 66 хувийг "Туркойз Хилл Ресурс" компани эзэмшдэг бол тус компанийн 51 хувийг "Рио Тинто" групп эзэмшдэг юм.
"Монголын Зэс" корпораци 2016 онд Засгийн газрын зөвшөөрлөөр ОХУ-аас "Эрдэнэт үйлдвэр"-ийн 49 хувийг худалдан авсан ч парламентын зарим гишүүд уг худалдан авалтыг эсэргүүцэж, тус уурхайг нийгэмчлэх шийдвэр гаргасан юм. "Монголын Зэс" корпораци уг худалдан авалт нь хууль ёсны дагуу хийгдсэн бөгөөд Засгийн газар Дээд шүүхийн шийдвэрийг үгүйсгэж байгаа нь Үндсэн хууль зөрчиж байна гэж мэдэгдсэн.
Төрийн өмчит "Эрдэнэт үйлдвэр"-т хувийн компанийн менежмент орсноор ашигт ажиллагаа сайжирж, төсөвт төвлөрүүлэх орлого нэмэгдэнэ. Өнгөрсөн оны эхний хагаст л гэхэд "Эрдэнэт үйлдвэр" төсөвт өмнөхөөс 4 дахин өндөр татвар төвлөрүүлжээ.
Зууны мэдээ