Энэ үеэр Нийслэлийн Засаг дарга бөгөөд Улаанбаатар хотын Захирагч С.Батболд “Зун болохоор зам барих, дулааны шугам сүлжээ болон цэвэр усны шугам, ариутгал, татуургыг солихтой холбоотой авто замыг хаадаг. Энэ нь иргэдийн бухимдлыг төрүүлдэг. Дулааны шугам сүлжээ, Ус сувгийн удирдах газар, Орон сууц нийтийн аж ахуйн газар, Захирагчийн ажлын алба зэрэг байгууллагын хоорондын ажлын уялдаа холбоогүйн улмаас жил бүр засвар шинэчлэлийн ажил хийгддэг. Тиймээс эдгээр ажлыг уялдуулах үүднээс дэд бүтэц, өргөтгөл шинэчлэлийн ажлын график гаргасан. Графикийн дагуу холбогдох байгууллагууд ажиллаж, заасан хугацаандаа амжиж дэд бүтцийн ажлыг хийж дуусгана.
Улаанбаатар хотод дэд бүтцийн чиглэлд энэ жил хөрөнгө оруулалт нэлээн идэвхжих хандлагатай байна. Олон улсын санхүүгийн байгууллагуудаас авсан зээлийн хүрээнд гэр хорооллыг хөгжүүлэх төслийн ажил энэ зун нэлээн идэвхжинэ. Тиймээс нэгдсэн ажлын графикийн дагуу явна. Өнөөдөр батлагдаж гарч буй графикийн дагуу холбогдох байгууллагынхан иргэдэд хүндрэл учруулахгүйгээр, урьдчилан мэдээ мэдээллийг цаг алдалгүй хүргэж ажиллах хэрэгтэй. Өмнө нь хэрэглээний халуун усыг хаах тохиолдол бүтэн сараар үргэлжилдэг байсан бол одоо хамгийн дээд тал нь 7 хоногийн дотор халуун усыг хаахаар төлөвлөж байгаа. Болж өгвөл хэрэглээний халуун усыг хаахгүйгээр засвар шинэчлэлийн ажил хийхэд онцгой анхаарч ажиллана" гэлээ.
Г.Зул