Монголын үндэсний бөхийн холбоонд үүсээд байсан маргаан өнөөдөр эцэслэгдэж байна. Тус холбооны тэргүүн Р.Нямдорж эртнээс албаа өгөх болсноо мэдэгдсэн бөгөөд энэ албаны сэнтийд улайрсан эрх мэдэлтнүүд хэл ам, хэрүүл тэмцэл хийж хэсэг хугацаанд багагүй дуулиан шуугиан тарьсан юм. Харин өнгөрсөн сард болсон “VIII их эе” хуралдаанаар УИХ-ын гишүүн, Дархан аварга Б.Бат-Эрдэнэ ганцаараа нэр дэвшиж, 100 хувийн саналаар сонгогдсон билээ. Мөн энэхүү хурлаар Цэцдийн зөвлөлийн 67 гишүүнийг шинээр баталсан билээ.
Өнөөдөр Бөхийн өргөөнд шинээр томилогдсон Цэцдийн зөвлөлийн хурал болж байна. Хурлын эхэнд Монголын Үндэсний бөхийн холбооны тэргүүнээр сонгогдсон УИХ-ын гишүүн, Дархан аварга Б.Бат-Эрдэнэ Р.Нямдоржоос албан ёсоор тамгаа хүлээж авлаа.
Тэргүүнээр сонгогдсон Б.Бат-Эрдэнэ “Монгол бөхийн барилдааны бүртгэлийг цахимаар бүртгэж эхэлсэн. Үүнийг цаашид үргэлжлүүлж, бөхийн барилдааныг камераар шүүж, цахимаар тасалбар борлуулах зэрэг ажлыг цаашид үргэлжлүүлж хийнэ” гэсэн бол Р.Нямдорж “Монгол бөхийн оройн шүтээн Б.Бат-Эрдэнэ аваргад тамгаа гардуулж буйдаа сэтгэл амгалан байна” гэжээ.
О.Сайхан
olloo.mn
Нэвтрэх