Улсын нэгдсэн төв эмнэлэгт зүрх шилжүүлэн суулгах мэс засал хийх гэсэн нэрийн дор зүрхний хагалгаа хийж хүний амь нас хохироосон асуудлаар өнөөдөр Гавьяат эмч, АУ-ны доктор, профессор Л.Жамбалжав мэдээлэл хийлээ.
Тэрбээр “Мэргэжлийн эмч нар алдаа гаргаж, залуу эмчээр хагалгааг удирдуулан, явуулын гадны эмч нарыг байлгаж яаруу сандруу хагалгаа хийснээс болж хоёр хүний амь нас хохирсон харамсалтай зүйл боллоо.
Энэ харамсалтай зүйлийг би улстөржүүлэх зорилго алга. Гэхдээ эрүүл мэндийн салбар болоод улсын эмнэлгүүдийн шоудалт хэрээс хэтэрлээ. Сүүлийн жилүүдэд эрүүл мэндийн салбар доголдож зохион байгуулалт алдагдаж, эмч, ажилтнуудын хариуцлага яригдах болсон. Салбарыг улстөржүүлсэн эцэст зарим нэгэн хүмүүс албан тушаал эрх мэдэл, нэр алдрын төлөө улайран зүтгэж хууль зөрчиж хүмүүсийн амь насыг хохироож байна. Тиймээс би мэдэгдэл гаргаж байна” гэдгийг хэлсэн юм.
Ингээд түүнээс зарим асуултад хариулт авлаа.
-Өнгөрсөн долоо хоногт УНТЭ зүрх шилжүүлэн суулгах хагалгаа хийсэн ч амжилтгүй болсон гэдгээ мэдэгдсэн. Юунаас болж алдаа гарсан юм бол?
-Энэ сарын 21, 23-ны өдрүүдэд УНТЭ-т 64 настай өвчтөн Д гэдэг эмэгтэй гол судасны хавхлага суулгах мэс засал, 30 настай өвчтөн З гэдэг эмэгтэйд зүрхний тосгуур хоорондын таславчийн цоорхой нөхөх мэс заслыг хиймэл цусны эргэлтийн аппарат ашиглан хуурай зүрхэн дээр хийсэн байгаа юм. 64 настай Д нь хагалгааны явцад зүрхний тэжээгч титэм судасны гэмтлийн улмаас венийн судсаар зүрхэнд нэмэлт судас залгах мэс заслыг хийсэн бололтой. Гэвч өвчтөний зүрх хиймэлээр зогссоны дараа сэргээгүй өвчтөн хагалгааны ширээн дээрээ нас барсан. Хоёрдахь хагалгаа өвчтөн З-гийн тосгуурын таславчийн цоорхойд нөхөөс хийх хагалгааны дараа өвчтөн хүндэрч зүрх зогссон байна. Энэ бол маш харамсалтай байна. Хэний алдаа байсан вэ гэдгийг холбогдох газруудаас нь шалгаж тогтоох байх.
-Эмч нарын зүгээс зүрх шилжүүлэн суулгах хагалгаа гэсэн мэдээлэл хийсэн. Гэвч яг зүрх шилжүүлэн суулгаагүй юм байна?
-Монголд анх удаа зүрх шилжүүлэн суулгах хагалгаа хийнэ гэж олон нийтэд буруу ойлголт өгсөн байгаа юм. Ингэж тайлбарласны учрыг бол мэдэхгүй. Уг нь дээрх мэс заслуудыг 3-р эмнэлгийн зүрхний мэс засалчид болох миний шавь нарын өдөр тутмын ердийн хийдэг хагалгаа юм. Хүнд өвчтэй хүн хагалгааны дараа, хагалгааны үед ч нас барах тохиолдол байдаг. Гэхдээ дээрх хоёр тохиолдол бол цэвэр эмч, эмнэлгийн үйл ажиллагаатай холбоотой гэж үзэж болохоор байгаа юм.
-Тэгээд яагаад 3 дугаар эмнэлэгт хийхгүй, нэгдсэн төв эмнэлэгт хийсэн юм бол?
-Тэрийг мэдэхгүй, хагалгаа хийсэн эмч нараас нь асуух зүйтэй байх. Хамгийн анхаарал татаж байгаа нь мэс засал хийхийн өмнө Улсын 3 дугаар эмнэлгийн болон 1 дүгээр эмнэлгийн удирдлагууд, зарим эмч нарын хамт зүрх шилжүүлэн суулгах мэс засал хийнэ гэж хэвлэл мэдээллээр ярьж байсан нь энэ хагалгааг зүрх шилжүүлэн суулгах мэс засал юм байна гэсэн буруу ойлголтыг нийгэмд өгсөн.
-Хагалгаа хийх явцад хүний амь нас хохирсон болохоор хариуцлагын асуудал хэнд дээр яригдах ёстой вэ?
-Баг бүрдүүлж эмнэлгийн даргаар ажиллаж байсан Б.Бямбадоржийн тушаалаар унтуулгын эмч Л.Ганболдоор ахлуулсан ажлын үргэлжлэл хэрэгжүүлэлт гэж үзэх үндэстэй. Үүнийгээ ч Бямбадорж одоо ЭМС-ын бодлогын зөвлөхийн албан тушаалар эрүүл мэндийн сайд яамандаа нөлөөлж, хоёр эмнэлгийн удирдлагыг нийлүүлэн зүрхний мэс заслыг эхлүүлсэн хүн. Манайх зүрх шилжүүлэн суулгах мэс заслыг нэвтрүүлж болно. Нэвтрүүлэх ч болно. Харамсалтай нь ингэж хүний амь хохироож болохгүй юм.
-Нас барсан өвчтөнүүдийг задлан шинжилгээнд оруулсан юм болов уу?
-Нас барсны дараа үхлийн шалтгааныг задлан шинжилгээгээр нотолдог. Харамсалтай нь ямар ч задлан шинжилгээ дүгнэлт хийлгүй, ар гэрийнхэн нь хүсээгүй гэдэг шалтгаанаар явуулсан нь хууль зөрчсөн, алдаа дутагдлаа гэмт хэргийн нотлох баримтыг санаатай нуун дарагдуулсан гэж үзэж байна.
-Хагалгааг залуу эмч гардаж хийсэн гээд байх юм. Залуу эмчид хэн үүрэг даалгавар өгсөн байх уу?
-Мэс заслын ажил бол хамт олны багийн хөдөлмөр байдаг. Зүрхний мэс заслын тасгуудад хэдэн сар дагалдсан ямар ч туршлагагүй бие дааж зүрхний хагалгаа хийгээгүй залуу эмчээр хагалгааг гардуулж байгаа нь ямар учиртай юм бэ. Зүрхний мэс засал хийдэг 50 гаруй жилийн туршлагатай мэргэжлийн хамт олон байсаар байтал унтуулгын эмчээр ахлуулсан зүрх шилжүүлэн суулгах баг гэдэс дотрын хагалгаа хийдэг газар байсаар байтал, хагалгааг хийдэг мэргэшсэн эмчгүй байж хийсэн шалтгаан нь юу вэ. Зүрхний хагалгааг хийх орчин нөхцөл бүрдээгүй, дутуу багажтай өөр эмнэлгээс зарим багаж хэрэгсэл зөөж яаруу сандруу орчин бүрдүүлж хийсэн. Тусгай нарийн мэргэжлийн эмч нар яагаад хагалгааг гардаж хийгээгүй юм бэ. Өвчтөнүүдийн хувьд эмнэлгийн хаалгаар хоёр хөлөөрөө орж ирсэн. Яагаад заавал явуулын эмч нартай хамт нийлээд мэргэжлийн бус газар яаралтай мэс засал хийх үндэслэл юу байв. Залуу эмч нар ганцаараа дур мэдэж хагалгаа хийхгүй. Хэний зөвшөөрлөөр хэний томилгоогоор мэс заслын багийг удирдах болов, мэс засалд шаардлагатай эм хэрэгслийн мөнгийг ямар замаар бүрдүүлсэн бэ гээд маш олон асуудал гарч ирж байгаа юм.
-Мэргэжлийн алдаа гаргасан эмч нартай хариуцлага тооцох боломж бий юу. Талийгаачийн ар гэрийнхэнтэй нь холбогдсон уу?
-Ямар хүмүүс байгааг би мэдэхгүй. Би ямар хагалгаанд орсон биш. Хариуцлагын асуудал шат шатандаа яригдах байх. Хамгийн гол нь миний хувьд саяын энэ болсон асуудлыг Засгийн газар анхааралдаа авч, мэргэжлийн хяналтын байгууллага мэргэжлийн дүгнэлт, холбогдох хуулийн байгууллага хууль зөрчсөн асуудлыг анхааран тогтоож, холбогдох арга хэмжээг авах нь зүйтэй гэж үзэж байна.
О.Сайхан
Оллоо.mn
Тэрбээр “Мэргэжлийн эмч нар алдаа гаргаж, залуу эмчээр хагалгааг удирдуулан, явуулын гадны эмч нарыг байлгаж яаруу сандруу хагалгаа хийснээс болж хоёр хүний амь нас хохирсон харамсалтай зүйл боллоо.
Энэ харамсалтай зүйлийг би улстөржүүлэх зорилго алга. Гэхдээ эрүүл мэндийн салбар болоод улсын эмнэлгүүдийн шоудалт хэрээс хэтэрлээ. Сүүлийн жилүүдэд эрүүл мэндийн салбар доголдож зохион байгуулалт алдагдаж, эмч, ажилтнуудын хариуцлага яригдах болсон. Салбарыг улстөржүүлсэн эцэст зарим нэгэн хүмүүс албан тушаал эрх мэдэл, нэр алдрын төлөө улайран зүтгэж хууль зөрчиж хүмүүсийн амь насыг хохироож байна. Тиймээс би мэдэгдэл гаргаж байна” гэдгийг хэлсэн юм.
Ингээд түүнээс зарим асуултад хариулт авлаа.
-Өнгөрсөн долоо хоногт УНТЭ зүрх шилжүүлэн суулгах хагалгаа хийсэн ч амжилтгүй болсон гэдгээ мэдэгдсэн. Юунаас болж алдаа гарсан юм бол?
-Энэ сарын 21, 23-ны өдрүүдэд УНТЭ-т 64 настай өвчтөн Д гэдэг эмэгтэй гол судасны хавхлага суулгах мэс засал, 30 настай өвчтөн З гэдэг эмэгтэйд зүрхний тосгуур хоорондын таславчийн цоорхой нөхөх мэс заслыг хиймэл цусны эргэлтийн аппарат ашиглан хуурай зүрхэн дээр хийсэн байгаа юм. 64 настай Д нь хагалгааны явцад зүрхний тэжээгч титэм судасны гэмтлийн улмаас венийн судсаар зүрхэнд нэмэлт судас залгах мэс заслыг хийсэн бололтой. Гэвч өвчтөний зүрх хиймэлээр зогссоны дараа сэргээгүй өвчтөн хагалгааны ширээн дээрээ нас барсан. Хоёрдахь хагалгаа өвчтөн З-гийн тосгуурын таславчийн цоорхойд нөхөөс хийх хагалгааны дараа өвчтөн хүндэрч зүрх зогссон байна. Энэ бол маш харамсалтай байна. Хэний алдаа байсан вэ гэдгийг холбогдох газруудаас нь шалгаж тогтоох байх.
-Эмч нарын зүгээс зүрх шилжүүлэн суулгах хагалгаа гэсэн мэдээлэл хийсэн. Гэвч яг зүрх шилжүүлэн суулгаагүй юм байна?
-Монголд анх удаа зүрх шилжүүлэн суулгах хагалгаа хийнэ гэж олон нийтэд буруу ойлголт өгсөн байгаа юм. Ингэж тайлбарласны учрыг бол мэдэхгүй. Уг нь дээрх мэс заслуудыг 3-р эмнэлгийн зүрхний мэс засалчид болох миний шавь нарын өдөр тутмын ердийн хийдэг хагалгаа юм. Хүнд өвчтэй хүн хагалгааны дараа, хагалгааны үед ч нас барах тохиолдол байдаг. Гэхдээ дээрх хоёр тохиолдол бол цэвэр эмч, эмнэлгийн үйл ажиллагаатай холбоотой гэж үзэж болохоор байгаа юм.
-Тэгээд яагаад 3 дугаар эмнэлэгт хийхгүй, нэгдсэн төв эмнэлэгт хийсэн юм бол?
-Тэрийг мэдэхгүй, хагалгаа хийсэн эмч нараас нь асуух зүйтэй байх. Хамгийн анхаарал татаж байгаа нь мэс засал хийхийн өмнө Улсын 3 дугаар эмнэлгийн болон 1 дүгээр эмнэлгийн удирдлагууд, зарим эмч нарын хамт зүрх шилжүүлэн суулгах мэс засал хийнэ гэж хэвлэл мэдээллээр ярьж байсан нь энэ хагалгааг зүрх шилжүүлэн суулгах мэс засал юм байна гэсэн буруу ойлголтыг нийгэмд өгсөн.
-Хагалгаа хийх явцад хүний амь нас хохирсон болохоор хариуцлагын асуудал хэнд дээр яригдах ёстой вэ?
-Баг бүрдүүлж эмнэлгийн даргаар ажиллаж байсан Б.Бямбадоржийн тушаалаар унтуулгын эмч Л.Ганболдоор ахлуулсан ажлын үргэлжлэл хэрэгжүүлэлт гэж үзэх үндэстэй. Үүнийгээ ч Бямбадорж одоо ЭМС-ын бодлогын зөвлөхийн албан тушаалар эрүүл мэндийн сайд яамандаа нөлөөлж, хоёр эмнэлгийн удирдлагыг нийлүүлэн зүрхний мэс заслыг эхлүүлсэн хүн. Манайх зүрх шилжүүлэн суулгах мэс заслыг нэвтрүүлж болно. Нэвтрүүлэх ч болно. Харамсалтай нь ингэж хүний амь хохироож болохгүй юм.
-Нас барсан өвчтөнүүдийг задлан шинжилгээнд оруулсан юм болов уу?
-Нас барсны дараа үхлийн шалтгааныг задлан шинжилгээгээр нотолдог. Харамсалтай нь ямар ч задлан шинжилгээ дүгнэлт хийлгүй, ар гэрийнхэн нь хүсээгүй гэдэг шалтгаанаар явуулсан нь хууль зөрчсөн, алдаа дутагдлаа гэмт хэргийн нотлох баримтыг санаатай нуун дарагдуулсан гэж үзэж байна.
-Хагалгааг залуу эмч гардаж хийсэн гээд байх юм. Залуу эмчид хэн үүрэг даалгавар өгсөн байх уу?
-Мэс заслын ажил бол хамт олны багийн хөдөлмөр байдаг. Зүрхний мэс заслын тасгуудад хэдэн сар дагалдсан ямар ч туршлагагүй бие дааж зүрхний хагалгаа хийгээгүй залуу эмчээр хагалгааг гардуулж байгаа нь ямар учиртай юм бэ. Зүрхний мэс засал хийдэг 50 гаруй жилийн туршлагатай мэргэжлийн хамт олон байсаар байтал унтуулгын эмчээр ахлуулсан зүрх шилжүүлэн суулгах баг гэдэс дотрын хагалгаа хийдэг газар байсаар байтал, хагалгааг хийдэг мэргэшсэн эмчгүй байж хийсэн шалтгаан нь юу вэ. Зүрхний хагалгааг хийх орчин нөхцөл бүрдээгүй, дутуу багажтай өөр эмнэлгээс зарим багаж хэрэгсэл зөөж яаруу сандруу орчин бүрдүүлж хийсэн. Тусгай нарийн мэргэжлийн эмч нар яагаад хагалгааг гардаж хийгээгүй юм бэ. Өвчтөнүүдийн хувьд эмнэлгийн хаалгаар хоёр хөлөөрөө орж ирсэн. Яагаад заавал явуулын эмч нартай хамт нийлээд мэргэжлийн бус газар яаралтай мэс засал хийх үндэслэл юу байв. Залуу эмч нар ганцаараа дур мэдэж хагалгаа хийхгүй. Хэний зөвшөөрлөөр хэний томилгоогоор мэс заслын багийг удирдах болов, мэс засалд шаардлагатай эм хэрэгслийн мөнгийг ямар замаар бүрдүүлсэн бэ гээд маш олон асуудал гарч ирж байгаа юм.
-Мэргэжлийн алдаа гаргасан эмч нартай хариуцлага тооцох боломж бий юу. Талийгаачийн ар гэрийнхэнтэй нь холбогдсон уу?
-Ямар хүмүүс байгааг би мэдэхгүй. Би ямар хагалгаанд орсон биш. Хариуцлагын асуудал шат шатандаа яригдах байх. Хамгийн гол нь миний хувьд саяын энэ болсон асуудлыг Засгийн газар анхааралдаа авч, мэргэжлийн хяналтын байгууллага мэргэжлийн дүгнэлт, холбогдох хуулийн байгууллага хууль зөрчсөн асуудлыг анхааран тогтоож, холбогдох арга хэмжээг авах нь зүйтэй гэж үзэж байна.
О.Сайхан
Оллоо.mn