Цусны даралт ихсэлтийн эсрэг аян Хөвсгөл аймагт үргэлжилж байна
Улсын III төв эмнэлэг, ХААН Банк, Нийгмийн эрүүл мэндийн үндэсний төвөөс хамтран хоёр дахь жилдээ хэрэгжүүлж буй Цусны даралт ихсэлтийн эсрэг аян өнөөдөр хоёр дахь аймаг болох  Хөвсгөл аймагт нээлтээ хийлээ. Нээлтийн үеэр аймгийн төв талбайд нээлттэй өдөрлөг зохион байгуулж, олон нийтэд зүрх судасны өвчнөөс урьдчилан сэргийлэх мэдлэг олгох, иргэдийн даралтыг үнэ төлбөргүй үзэж эрсдэлт бүлгийг тодорхойлохын зэрэгцээ зөвлөгөө мэдээлэл хийн ажиллаж байна.


 
Аяныг зохион байгуулагчдын баг Хөвсгөл аймагт ажилласан эхний өдрөө аймаг, орон нутгийн эмч мэргэжилтнүүдэд сургалт зохион байгуулсан бол хоёр дахь өдөр буюу өнөөдөр орон нутгийн иргэдэд эмнэлгийн тусламж үйлчилгээг ойртуулах үүднээс иргэдийн даралтыг хэмжиж, биеийн жингийн индекс тодорхойлон цусны даралт ихсэх өвчний эрт илрүүлэгт хамруулахын зэрэгцээ цусны даралт ихсэлт түүний эрсдэлт хүчин зүйлс, хүндрэлээс хэрхэн сэргийлэх тухай зөвлөгөө, мэдээлэл өгч байна.  Хөвсгөл аймгийн ЗДТГ,  Нэгдсэн эмнэлэг, ЭМГ-ын  хамт олон аяныг өргөн цар хүрээтэй, үр дүнтэй хэрэгжүүлэхэд хамтран ажилласны үр дүнд аймгийн төвийн төдийгүй сум, орон нутгийн олон иргэдийн хамруулж чадлаа.


 
Гурав дахь өдөр буюу аяны сүүлийн өдөр нээлттэй өдөрлөгийн үеэр үзлэгт хамрагдаж, цусны даралт нь өндөр гарсан болон зүрх судасны өвчин илэрсэн иргэдэд  III төв эмнэлгийн  нарийн мэргэжлийн эмч нар аймгийн нэгдсэн эмнэлгийн эмч ажилтнуудтай  хамтран нарийвчилсан үзлэг шинжилгээнд хамруулж, зөвлөгөө мэдээллээр ханган ажиллах юм.
 
Иргэд, олон нийтийг цусны даралт ихсэх өвчин, түүний эрсдэлт хүчин зүйлс, хүндрэлээс урьдчилан сэргийлэх мэдлэг, дадалд сургаснаар хүн амын өвчлөл, нас  баралтын гол шалтгааныг бууруулах боломжтой юм. Цусны даралт ихсэлтийн эсрэг аян ийнхүү Булган, Хөвсгөл аймгуудад амжилттай хэрэгжлээ.


 
1. О.Батгэрэл \П.Н Шастины нэрэмжит III төв эмнэлгийн эрдэм шинжилгээ, судалгаа, хамтын ажиллагаа эрхэлсэн орлогч дарга\


 
2. Х.Ган-Очир \Хөвсгөл аймгийн ЗДТГ-ын дарга\


 
3. С.Гантуяа \Нийгмийн эрүүл мэндийн үндэсний төвийн бодлогын хэрэгжилтийг зохицуулах хэлтсийн дарга\


 
4. Д.Цэцэгээ \ХААН Банкны Хөвсгөл салбарын захирал\


 
 
Бид нийгмийн сайн сайханд бодитой хувь нэмэр оруулна.
ХААН Банк Сан
 
Бусдад түгээх
  • gplus