ФОТО: Хагас жарны дараа Улаанбаатар хотын гүүрүүд шинэчлэгдэж байна

Нийслэлийн Засаг дарга бөгөөд Улаанбаатар хотын дарга С.Батболдоор ахлуулсан ажлын хэсэг нийслэл хотод хийгдэж байгаа зам гүүрийн бүтээн байгуулалтын ажлын явцад хяналт тавьж шалгалт хийлээ.

Нийслэл хотод БНХАУ-ын хөнгөлөлттэй зээлийн санхүүжилтээр дөрвөн том гүүрийн барилгын шинэчлэлийн  ажил хийгдэж байна.

Туул гол дээгүүрх Баянзүрхийн гүүрийг шинээр барих төслийн ажлын талбайд хотын даргаар ахлуулсан ажлын хэсэг очлоо. Гүүрийн барилга шинэчлэлийн ажлын гүйцэтгэгчээр “Бээжин Юни Констракшн групп Монголиа” ХХК ажиллаж байна. Гүүрийн барилгын ажил энэ оны таван сард эхэлсэн юм. 
 


Баянзүрхийн үндсэн гүүр 321 м, өргөн 22.6 метр. Тээврийн хэрэгсэл 4 эгнээгээр зорчих боломжтойгоос гадна явган хүний 2 эгнээтэй замтай байх юм. Мөн гэрэлтүүлэг, тохижилт ногоон байгууламж хийгдэнэ.



Гүүрийн барилгын талбай дээр 823 тн арматур татан төвлөрүүлж хайрцган дам нурууны хэв хашмалыг ажлын талбайд ирүүлжээ. Одоогийн байдлаар хайрцган дам нурууны доод үеийн хэв хашмал угсарч, арматур зангидах ажил явагдаж байна. энэ онд хайрцган дам нурууны 159,84 метр хэсгийг цутгахаар төлөвлөсөн байна. Одоогоор барилгын ажил 24.7 хувьтай байна. Ирэх 11 дүгээр сар гэхэд дам нурууг бүрэн цутгаж гүүрийн ажлыг 60 хувь хүртэл хийх төлөвлөгөөтэй ажиллаж байна.
 


Барилгын ажлыг графикт хугацаандаа чанартай хийж гүйцэтгэхийг нийслэлийн Засаг дарга бөгөөд Улаанбаатар хотын Захирагч С.Батболд хэллээ. Гүүрийг 2020 оны 2 дугаар сард хүлээлгэн өгөх ч ирэх оны 11 дүгээр сар гэхэд гүүрийг бүрэн ашиглалтад оруулахаар ажлаа шуурхайлахыг гүйцэтгэгч компанид үүрэг болголоо.

 Замын цагдаагийн уулзварын гүүрийн бүтээн байгуулалт эрчимтэй хийгдэж байна

Замын цагдаагийн ойролцоо гүүрэн гарц барих төслийн ажлын талбай дээр ажлын хэсэг ирж ажиллаа. Уг гүүрэн гарц барих төслийн ажил зураг төслийн дагуу үргэлжилж байна. Одоогоор үндсэн гүүрийн 96 өрөмдөл шон сууриас 63 суурийн өрөмдлөг бетон цутгалтын ажил хийгдэж, 29 өрөмдмөл шон суурийн арматурын хэлхээсийн бэлдэц бэлдсэн. Хуваарилах хавтан 40 ширхгийг хийхээс 14, баганан тулгуур 42 хийхээс 9 багана, 3 баганын холбоосноос 1-ыг тус тус хийсэн байна.
 


Газар чөлөөлөлттэй холбоотой зарим нэг хүндрэлүүд үүссэнийг шийдвэрлэхийг газрын албанд үүрэг болголоо. Гүүрийн цахилгааны шугам сүлжээ, дулааны шугам хоолой, ариутгах татуургын хоолой, цэвэр усны шугамын шилжүүлэг хийгдэж байна.
 


Баянзүрх, Хан-Уул, Сүхбаатар дүүргүүдийн уулзвар, төмөр зам, авто замтай нэг түвшинд огтлолцдог энэ уулзварт гүүрэн гарц барьснаар хөдөлгөөний аюулгүй байдал хангагдах, замын хөдөлгөөний нэвтрэх чадвар сайжрах, тэр хэрээр замын ачаалал буурах чухал ач холбогдолтой юм.

Төслийн хүрээнд баригдах гүүрэн гарц нь нийт 6 хэсгээс бүрдэх ба Олимпийн гудамжнаас Нарны зам болон төмөр замын 406 дугаар гарам дээгүүр Их Монгол Улсын гудамж руу буух үндсэн гүүр 470 м урттай, 16.5 м өргөнтэй 4 эгнээ гүүр, Зүүн хойд талд үндсэн гүүрэн дээрээс Нарны зам руу холбогдох “С” рампын 8.5м өргөнтэй 2 эгнээ гүүр нийт 15у/м гүүр, 165 у/м тулц хана, нүхэн гарцын хамт, Нарны замын зүүн талаас ирэх авто зам үндсэн гүүрэнд холбогдож, Их Монгол улсын гудамж руу буух баруун хойд талын “В” рампын гүүр нь 8.5м өргөнтэй, 2 эгнээ нийт 160у/м гүүр, 110у/м тулц ханатай, Нарны замын баруун талаас ирэх авто машин үндсэн гүүрэн дээгүүр гарч Их Монгол улсын гудамж руу буух “А” рампын гүүр нь 8.5м өргөнтэй 2 эгнээ нийт 400у/м гүүр, 237 у/м тулц ханатай, мөн төмөр зам дээгүүр явган хүний гүүр болон дунд гол дээгүүр усан паркийн замтай холбогдсон төмөр бетон гүүр барих юм. Төслийн нийт төсөвт өртөг 42,38 сая ам доллар болох бөгөөд гүүрийг 2019 онд бүрэн ашиглалтад оруулахаар төлөвлөн ажиллаж байна. Энэ оны  11 сар гэхэд  дам нурууныхаа гол суурийг хийж дуусгахаар төлөвлөн ажиллаж байгааг гүйцэтгэгч компанийн удирдлага хотын даргад  танилцууллаа.

Яармагийн гүүрийн ажил 11 сард дуусна

Яармагийн шинэ гүүр барих, хуучин гүүрийг засварлах төслийн хүрээнд Яармагийн гүүрийн хойд уулзвараас Ажилчны гудамж хүртэл 250 метр газар барилга угсралтын ажил хийгдэж гүүрийн зорчих хэсгийн нэг эгнээг Үндэсний их баяр наадмаас өмнө нээж хөдөлгөөн нэвтрүүлж эхэлсэн. Уг төслийг Хятад улсын Засгийн газрын хөнгөлөлттэй зээлээр хэрэгжүүлж байгаа юм.
 




Гүүр дөрвөн эгнээ, 250 метрийн урттай, хуучин гүүрнээс гурав дахин их ачаалал авч хөдөлгөөнийг нэвтрүүлэх чадалтай шинэ гүүр 50-60 жилийн баталгаатай юм байна. Ашиглалтад орсноор Яармагийн гүүрний орчмын замын түгжрэл 50-60 хувь буурах юм. Шинэ гүүрний доор 50 метрийн өргөнтэй нүхэн гарц баригдаж  байгаа. Мөн 8.5 метрийн өргөнтэй, 270 метрийн урттай Д рамп гүүрний дээгүүр баригдаж байгаа болохоор замууд хоорондоо огтлолцохгүй байх юм.
 


Яармагийн гүүрийн бүтээн байгуулалтын ажлыг  хугацаанд нь чанартай гүйцэтгэж байгаа төдийгүй  гэрэлтүүлэг, ус зайлуулах  төхөөрөмж, дугуйн зам гээд иж бүрнээр нь хүлээлгэн өгнө гэдгээ  гүйцэтгэгч болон зөвлөх компаниудын инженерүүд ярьж байна.  Энэ гүүр ашиглалтанд орсоноор хуучин, шинэ нисэх онгоцны буудлын авто замын хөдөлгөөний хамгийн гол ачааллыг даах юм.

Хагас жарны дараа  Улаанбаатар хотын гүүрүүд шинэчлэгдэж байна

Нийслэлийн Засаг даргаар ахлуулсан ажлын хэсэг Хан-Уул дүүргийн Сонсголонгийн гүүрний барилгын ажлын талбайд очлоо. Уг гүүрийг шинэчлэн барьснаар эдийн засаг болон нийслэл хотын төлөвлөлтөд чухал ач холбогдолтой юм. Энэ төслийн хүрээнд сонсголонгийн хуучин гүүрний хажууд параллелиар 10.4 метр өргөн 2 эгнээтэй, 289.4 метр гүүр шинээр барьж, хуучин гүүрийг шинэчлэн, нийт 21 метр өргөнтэй 4 эгнээ гүүр бий болох юм.
 


Төслийн нарийвчилсан зураг төслийг зөвлөх үйлчилгээний “ГБЕТ” ХХК боловсруулсан байна. Гүйцэтгэгчээр “Бээжин Юни-Констракшн Групп” компани шалгарч, төслийн барилгын ажлыг гүйцэтгэж байна.

Төслийн барилгын ажлын туслан гүйцэтгэгч “Ган гүүр” ХХК-ийн ерөнхий инженер Н.Лхагвадорж “Сонсголонгийн гүүрийн барилгын ажил хэвийн явагдаж байна. Барилгын ажил 5 сард эхэлсэн. Үндэсний их баяр наадмаас хойш бороо элбэгтэй байсан учир гол үерлэж ажил бага зэрэг удааширсан. Одоогоор барилгын ажил 30 хувьтай байгаа ч ирэх 11 сар хүртэл ажиллана. Гүүрийг ирэх 2019 оны 11 дүгээр сард ашиглалтад өгөх ёстой. Энэ оны 11 сар хүртэл дам нуруу, бетон цутгалтыг хийж дуусгаад 1 сард мөс хөлдсөн үед угсралтын ажил эхэлнэ. Ирэх 7 сард баяр наадмаас өмнө шинэ гүүрийг нээгээд 11 сар хүртэл хугацаанд хуучин гүүрийг сэргээн засах ажлыг хийнэ” гэлээ.  
 


Нийслэлийн Засаг дарга бөгөөд Улаанбаатар хотын Захирагч С.Батболд “Улаанбаатар хотод 2016-2020 онд 4 том гүүрийн барилгын  шинэчлэл бүтээн байгуулалтыг хийж ашиглалтад хүлээн авахаар ажиллаж байна.  Эхний гүүр энэ оны 11 сард ашиглалтад орно. Нийслэл хот захиалагчийн хувьд өдөр тутам барилгын ажилд хяналт тавьж, мөн заавар зөвлөгөө өгч ажиллаж байна. Миний хувьд зам гүүрийн бүтээн байгуулалтын ажилтай гурав дах удаагаа танилцаж байна. Бүх ажил графикийн дагуу явагдаж байна. Замын цагдаагийн гүүрний барилгын ажил хоцрогдолтой байсан. Учир нь хотын төвд учир олон сувагжилт тухайлбал дулаан, цэвэр,  холбоо мэдээлэл, цахилгааны сувагчлалууд мөн газар чөлөөлөлт гээд төлөвлөгдөөгүй ажлууд гарч ирсэн. Гэхдээ гүйцэтгэгч компани ажлын хоцрогдолдоо нөхөж ажиллаж байна. Ихэнх гүүрүүд 1960-аад онд баригдсан учир Туул гол дээрх  гүүрүүдийг шинэчлэх шаардлагатай юм. Хүндрэлтэй асуудал нь энэ ажлын санхүүжилтийг сангийн яам төсвийн хязгаарлалтай холбоотой бага тавьсан. Гүйцэтгэгч компаниуд өөрсдийн бололцоог ашиглан ажиллаж байна. Нийслэл хотын зүгээс бид дотоод зохицуулалт хийж бусад зээл тусламжийн хөрөнгийг шилжүүлэх замаар шийдвэрлэж байна. Гүүр барих гэдэг зүгээр барилга байгууламжийн асуудал биш доогуур нь олон сувагчлал, дэд бүтцийн шугам шилжүүлэх зэрэг олон асуудал байдаг. Улаанбаатар хотод 2020 он гэхэд томоохон гүүрүүд бүгд шинэчлэгдэнэ. Нийслэл хотын төв гүүрүүд учраас өнгө үзэмжтэй байх ёстой гэдэг шаардлагыг бид тавьж байна. Эдгээр гүүрүүд ашиглалтад орвол Зайсангийн гүүрийг шинэчлэх ажил үлдэнэ. Гүүрийн засвар шинэчлэлтийн ажилд туслан гүйцэтгэгчээр оролцож байгаа монгол компаниуд туршлага хуримтлуулж Зайсангийн гүүрийг бид монгол компанийн, монгол инженерүүдтэй хамтран шинэчлэх төлөвлөгөөтэй байгаа. Орчин үеийн өнгө загвартай хийхээр төлөвлөж байна” гэлээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
















 

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.