Сургууль, цэцэрлэгийн орчинд ухаалаг гар утас ашиглахыг хориглов

Сургалтын орчинд авах арга хэмжээний тухай Засгийн газрын тогтоол гарлаа. Тогтоолд Ерөнхий боловсролын сургууль, цэцэрлэгийн сургалтын орчинд ухаалаг гар утас ашиглахыг ирэх сарын нэгний өдрөөс хязгаарлахаар заав. Энэ нь хүүхдүүдийг цахим халдлага, донтолт, гадуурхлаас сэргийлэх, эрүүл мэнд, амь насыг хамгаалах, аюулгүй байдлыг хангах, сурах идэвхийг нэмэгдүүлэх, хүүхдүүдийн чөлөөт цагийг үр ашигтай өнгөрүүлэх, нийгмийн бодит харилцаанд оролцох боломжийг нэмэгдүүлэх зорилготой авч буй арга хэмжээ юм. Дэлхий нийтэд мэдээлэл харилцааны технологи хөгжихийн хирээр хүн амын дунд нийгэм эдийн засгийн харилцааны салшгүй нэг хэсэг нь болоод буй гар утасны хэрэглээ хүүхэд залуучуудын дунд мөн тэр хэмжээгээр олон сөрөг үр дагаварыг бий болгож байгаа нь төрөөс зайлшгүй бодлогын зохицуулалтыг шаардаж байна.

Монгол Улсын нийт хүн амын 80,6 хувь нь интернет хэрэглэгч, 99,7 хувь нь гар утас хэрэглэж байна.  БСШУСЯ, Дэлхий банктай хамтран 2017 онд явуулсан судалгаанаас үзвэл хот, хөдөө, орон нутгаас сонгогдсон 14 ерөнхий боловсролын сургуулийн 8-17 насны 1278 сурагчаас 71,8 хувь нь өөрийн гар утастай бөгөөд тэдний 54,6 хувь нь цахим орчинд аялах боломжтой ухаалаг гар утас хэрэглэдэг гэжээ. Тэгвэл гуравдугаар ангийн хүүхдүүдийн 40,8 хувь, тавдугаар ангийнхны 68,3 нь мөн л ухаалаг утастай гэж хариулсан байна. Гэтэл гар утасны өндөр давтамжит цахилгаан соронзон туяа нь хүүхдийн эсийн хөгжилд сөрөг нөлөөтэй учир 12 нас хүртэлх хүүхдэд аюул ослоос бусад үед гар утас хэрэглүүлэхгүй байхыг олон улсын эрдэмтэн судлаачид зөвлөсөөр байна.

Он гарсаар Хүүхдийн тусламжийн 108 утасны үйлчилгээний төвд цахим дарамтад өртсөн 125, цахим донтолтын 35 дуудлага бүртгэдэж, хүүхдүүд хамгааллын үйлчилгээ авсан бол Сэтгэцийн эрүүл мэндийн төвд цахим донтолттой 23 хүүхэд хэвтэн эмчлүүлсэн бөгөөд цаашид өсөх хандлагатай байгаа гэв. Тэгвэл Улаанбаатар дахь нийт сурагчдын 96,9 хувь нь нүүрном/facebook/-ын хаягтай бол хөдөөгийн сурагчдын 93 хувь нь нүүрномд өөрийн гэсэн хаягтай тогтмол хэрэглэдэг болжээ. Улсын хэмжээнд хүн амд ногдох нүүрномын хуудас хэрэглэгчийн тоогоор Монгол Улс дэлхийн дунджаас 2,1 дахин,  Ази тивийн улс орнуудаас 3,6 дахин их байна.

Эдгээр үзүүлтүүд нь хүүхэд багачууд, өсвөр үеийн сурагчдыг цахим хэрэглээний аливаа сөрөг үр дүнгээс урьдчилан сэргийлэх нэгдсэн бодлого хэрэгжүүлж, яаралтай арга хэмжээ авах шаардлага үүсгэснийг илтгэж байна. Эхний алхам нь ерөнхий боловсролын сургуулийн сургалтын явцад ухаалаг утас хэрэглэхийг хязгаарлах энэхүү шийдвэр юм. Хөгжлийн бэрхшээлтэй хүүхдүүдэд хязгаарлалт үйлчлэхгүйн дээр хичээлийн бус цагаар болон сургалт хүмүүжлийн зорилготой үйл ажиллагааг ухаалаг утсаар дамжуулан явуулахыг хориглоогүй болно. Онцгой шаардлагатай үед сурагчдын эцэг эх сургалт явуулж буй багш нарын гар утсаар дамжуулан хүүхэдтэйгээ ярьж болохоор тогтоолд тусгасан байна. Түүнчлэн хүүхэд залуучуудын дунд ухаалаг утас болон цахим хэрэглээг хэвшүүлэх хүрээнд тэдэнд ээлтэй бүтээгдэхүүн үйлчилгээг нэвтрүүлэх цахим хүчирхийлэл халдлагаас урьдчилан сэргийлэх, хариу арга хэмжээ авах, хариуцлагыг өндөржүүлж, гар утасны бэлэглэлийн болон хэрэглэгчийн бүртгэлгүй дугаарыг худалдаалахыг хориглох, хүүхдийн эзэмшиж, ашиглаж байгаа дугаарыг бүртгэлжүүлэхэд чиглэсэн ажлыг нийгмийн хариуцлагын хүрээнд үүрэн холбооны сүлжээ компаниудтай холбогдох байгууллагууд хамтран зохион байгуулах зэрэг арга хэмжээг авч хэрэгжүүлэх юм.

Х.Хулан

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.
  •  2018-09-05 13:06:08
    гаднаа гяланцаг дотроо паланцаг хүүхнүүдийн гай ихээ
  • 34 2018-09-05 12:33:12
    Zuvuuu 1000000%
  • ЗОчин 2018-09-05 12:05:11
    ёстой зөв шүү. Бүх сургуулиудад хоригло. Өмнө нь утасгүй амьдраад болоод л байсан. Одоо хөгшин залуугүй нийтээрээ ухаалаг утасны боол болж байна.
  • ээж 2018-09-05 11:34:13
    энэ ч зөв л дөө,Харин ухаалаг биш гар утас нь олдохгүй юм, Асуухаар утасны компанууд чинь товчлууртай утас оруулж ирэхгүй гэх юм,
  • Анар 2018-09-05 10:26:05
    маш зөв,хувийн сургуулиуд энд хамрагдах ёстой