УИХ-ын дарга “Чуулган хуралдах боломжгүй боллоо” хэмээн мэдэгдэж, өнөөдрийн чуулганы хуралдааныг хаалаа. Аль хэдийн дасал болсон үйл явц. Учир нь парламент ийнхүү гацаанд ороод сар гаруй хугацааг үдэж байна. Үнэмлэхүй олонх болсон МАН-ынхан хоёр талдаа гарч суучхаад би бие лүүгээ чичилж, муу муухайгаа дуудалцсаар өнөөдрийн нөхцөл байдлыг үүсгэлээ.
Монгол Улсын Их Хурлын чуулганы хуралдааны дэгийн тухай хуулийн 4 дүгээр зүйлийн 4.9 дэх хэсэгт “Гишүүн өвчтэй байсан буюу өвчтэй хүн асарсан, гадаад, дотоод томилолтоор явсан, түүнчлэн хурал, семинарт зайлшгүй оролцох шаардлагатай байсан бол хүндэтгэх шалтгаантай гэж үзэх бөгөөд эдгээр шалтгаан байхгүй бол хуралдаан тасалсанд тооцно.”, мөн зүйлийн 4.10 дахь хэсэгт “Монгол Улсын Үндсэн хуулийн тодорхой заалтыг илтэд зөрчсөн асуудал хэлэлцсэн, эсхүл Монгол Улсын Үндсэн хуульд нэмэлт, өөрчлөлт оруулахыг эсэргүүцэхээс бусад шалтгаанаар гишүүн, нам, эвслийн бүлэг хуралдаанд оролцохгүй байх буюу түүнийг орхиж гарахыг хориглоно” гэж заасан тул хуульд заагаагүй үндэслэлээр Улсын Их Хурлын гишүүн бөгөөд Засгийн газрын гишүүн чуулганы хуралдаанд оролцохгүй байх үндэслэлгүй.
Засгийн газар Монгол Улсын Үндсэн хуульд заасан хууль дээдлэх төрийн үйл ажиллагааны үндсэн зарчмыг зөрчих, төрийн эрх барих дээд байгууллагын үйл ажиллагааг тасалдуулах гэсэн хууль бус, зохион байгуулалттай арга хэмжээ авах ёсгүй юм. Иймд хуулиар хүлээсэн үүргээ биелүүлж, төрийн эрх барих, хууль тогтоох дээд байгууллагын үйл ажиллагааг хууль бусаар тасалдуулах гэсэн үйл ажиллагаагаа зогсоож, Байнгын, дэд, түр хорооны болон чуулганы нэгдсэн хуралдаанд оролцохыг гишүүүдээс шаардмаар байна.
Та бүхэн парламентын түүхийг хараар бичлээ. Хийх ажилгүй, шийдэх асуудалгүй улс оронд амьдарч байгаа мэт аяглаж, аашилж байгаа үйлдэл чинь хэрээс хэтэрч байна, гишүүдээ. Та бүхэн энэ төрд гай болохоор зай болоод өг!!!
П.ГОО
Оллоо.мн