МАН-ын дарга, Ерөнхий сайд У.Хүрэлсүх хотын дарга Су.Батболдыг ажлаа өгөхийг шаардсан. Үүнийг ч Су.Батболд дарга ёсоор болгож өөрийн хүсэлтээр ажлаас чөлөөлөгдөх хүсэлтээ гаргасан. Үүнээс хойш гурван сар шахмын хугацаанд хотын даргын албыг түр орлон гүйцэтгэгч хашиж байна. Хотын даргад хэнийг нэр дэвшүүлэх нь намын даргын бүрэн эрх. Иймээс ч Удирдах зөвлөл НИТХ-ын дарга С.Амарсайханыг нэр дэвшүүлсэн. Харин Удирдах зөвлөлийн шийдвэрээр сонгогдсон С.Амарсайхан бус заалнаас нэрээ дэвшүүлсэн С.Мөнхчулуун хотын даргаар сонгогдов. Улмаар Нийслэлийн Засаг дарга бөгөөд Улаанбаатар хотын захирагчид нэр дэвшигчийг сонгох санал хураалтад олонхын санал авсан С.Мөнхчулууныг батламжлуулах тухай албан бичгийг нэгдүгээр сарын 16-ны өдөр Ерөнхий сайдад хүргүүлээд байсан билээ. Харин удтал хүлээлгэсэн албан бичигт ийнхүү Ерөнхий сайд татгалзсан хариу өглөө. Дээр дурдсанчлан хуулийн дагуу Ерөнхий сайд НИТХ-ээс ирүүлсэн саналыг нэг удаа буцаах эрхтэй. Буцсан тохиолдолд 15 хоногийн дотор тухайн шатны хурал хэлэлцээд, дахин санал хүргүүлдэг. Үүний дараа тав хоногийн дотор Ерөнхий сайд Нийслэлийн Засаг даргыг томилох үүрэгтэй юм. Иймээс ойрын өдрүүдэд ээлжит хотын даргыг тодруулах марафон “Хангарьд” ордонд эхлэх нь ээ.
Хуулийн дагуу “ногоон гэрэл”-ээр томилогдох хотын даргын сунгаанд С.Мөнхчулуун даагаа нэхэх нь тодорхой. Харин түүнтэй өмнө нь хотын даргын томилгоонд яригдаж байсан ч Удирдах зөвлөлөөс дэмжлэг авч чадаагүй Б.Амарбаясгалан, Б.Мөнхбаатар, Р.Дагва нарын нэрс яригдаж байгаа гэнэ.
П.ГОО
Оллоо.мн