НИТХ өнөөдөр хуралдаж Хотын дараагийн даргыг сонсох асуудлыг хэлэлцэнэ. Энэ удаагийн Хотын даргын өрсөлдөөнд МАН-ын Удирдах зөвлөлөөс НИТХ-ын дарга С.Амарсайханыг санал болгосон бол НИТХ-ын төлөөлөгч С.Мөнхчулуун дахин өрсөлдөнө гэдгээ мэдэгдээд байна.
Өмнө нь НИТХ-ын тэргүүлэгчдийн хуралдаанаар С.Мөнхчулууныг төлөөлөгчдийн олонхын саналаар Хотын даргад дэмжсэн ч Ерөнхий сайд У.Хүрэлсүх батламжлаагүй. Улмаар удирдах зөвлөлийн шийдвэрийг зөрчсөн гэж С.Мөнхчулууныг МАН-ын Хяналтын хороо авч хэлэлцэж, намаасаа хассан.
Энэ удаагийн хуралдаанаар дэмжигдсэн төлөөлөгчийг Ерөнхий сайд У.Хүрэлсүх ажлын тав хоногт шууд батламжлах хуулийн зохицуулалттай юм. Эх сурвалжуудын мэдээлж байгаагаар НИТХ-ын төлөөлөгчид С.Амарсайханыг дараагийн Хотын даргаар сонгохоор саналаа нэгтгээд байгаа гэнэ. Угаас Улаанбаатар хотын 1.5 сая иргэдийн эрх ашигт нийцсэн шийдвэр гаргахад Ерөнхий сайд, Нийслэлийн Засаг даргын харилцан хамтын ажиллагаа, ойлголцол чухал. Өмнөх дарга С.Батболд ч үүнийг ухамсарлан ажлаа хүлээлгэн өгсөн. Иймээс намын Удирдах зөвлөлийн зүгээс дээрх чиг үүргийг хүлээж ажиллах хүнийг С.Амарсайхан хэмээн санал болгосон. Иймээс НИТХ дэх МАН-ын бүлгээс С.Амарсайхан итгэл үзүүлэхээр санал нэгдсэн тухай эх сурвалжууд мэдээлж байна.
П.ГОО
Оллоо.мн