УИХ-ын гишүүн, Барилга, хот байгуулалтын сайд асан З.Баянсэлэнгэтэй ярилцлаа.
-Сайн байна уу? Намын ажилтай явна уу?
-Намынхаа “Эх орончдын өдөр-Залуусын баяр” нэртэй арга хэмжээнд оролцлоо. Жил бүрийн гуравдугаар сарын 1-ийг Монгол Улсад улс төрийн нам үүсэн байгуулагдсан түүхт өдөр байдаг. Энэ өдрийг Н.Энхбаяр дарга Ерөнхийлөгчөөр ажиллаж байхдаа “Эх орончдын” өдөр болгон тэмдэглэж байхаар шийдвэрлэсэн байдаг. Харин манай нам энэ жил эх орны ирээдүй хойч болсон залуусын баяр болгон тэмдэглэлээ.
-Сонгуулиас хойш ямар ажил амжуулж байна даа?
-Ерөнхийлөгчийн сонгуулиас хойш МАХН-ынхан 21 аймаг есөн дүүрэгт ажиллаж байна. Нэгийг нөгөөгөөр сольж, хэн нэгнийх буруутгасаар 27 дахь жилтэйгээ нүүр туллаа. Бидний амьдрал байдаг л байрандаа тамын тогооны хэрүүлээ хийсээр л байна. МАН 65 суудалтай, үнэмлэхгүй олонх. Бүх зүйлд шийдэл гаргаад явах бүрэн боломжтой байсан ч сандал суудалтайгаа зууралдаж, улсын ажлыг гацаалаа. Энэ байдлаас гарахын тулд Үндсэн хуулийг өөрчлөлт хэрэгтэй. Ард түмэн ч үүнийг гарц гэж харж байна. Тогтолцооны, системийн гажуудлыг өөрчилж, эдийн засаг нийгмийн хямралаас гарах цорын ганц арга зам хийгээд Монгол хүн эх орондоо сайхан амьдрах боломж бол Үндсэн хуулийн өөрчлөлт. МАХН намууд, эрх баригчид, албан тушаалтанд ямар ч ашиггүй, ард түмэн, монгол хүн бүрт ашигтай Үндсэн хуулийн төслийг боловсруулаад хоёр жилийн хугацаанд ард түмнээсээ санал авч, гарын үсэг зуруулсан. Хамгийн сүүлд МАН-ын Гүйцэтгэх товчооны удирдлагууд СХД-т ажилласан. Ард түмний зүгээс хуулийг хурдан батлуулах нь гол арга зам гэдгийг иргэд ч хүлээн зөвшөөрч байна. Иргэдийн 51 буюу түүнээс дээш хувийн саналаар энэ төсөл дэмжсэн тохиолдолд энэ хуулийг батлуулахаар ажиллана.
-УИХ энэ хаврын чуулганаар Үндсэн хуульд гар хүрэхээр төлөвлөсөн байгаа шүү дээ?
- Өмнө нь ч Үндсэн хуульд нэмэлт өөрчлөлт хийж байсан.Гэхдээ өнөөдрийн хямрал гажуудлаас гарах арга зам бол Үндсэн хуулийг бүхэлд нь өөрчлөх хэрэгтэй. Эрх баригчид өөрсдөдөө ашигтай байдлаар л Үндсэн хуулийн өөрчлөлтийг ярина шүү дээ. Үндсэн хуулийн нэмэлт өөрчлөлтийн төсөлд өнөөдрийн хямралт байдлаас гарахад чиглэсэн өөрчлөлтүүд харагдахгүй байна. Бид хэн нэгнийг өөрчилж муу хэлэхээс илүү тогтолцоогоо өөрчлөх шаардлагатай байна.
-Хэнтийн аймгийн 42 дугаар тойргийн нөхөн сонгууль ирэх зургадугаар сард болох тов гарсан. Танай намаас Н.Энхбаяр даргыг нэр дэвших гэж байгаа тухай мэдээлэл байна?
-Нэгдүгээрт, нэр дэвших хуулийн хугацаа болоогүй. Хоёрдугаарт, намаас нэр дэвшигчдийг хуулийн хугацаандаа намуудын удирдах зөвлөл манайхаар бол Бага чуулган хэлэлцэж нэр дэвшигчээ тодруулдаг. Энэ дагуу л шийднэ. Одоогоор хэн нэгнийг нэр дэвшүүлэх талаарх асуудал яригдаагүй.
-Танай нам УИХ-ын дахь төлөөлөл О.Баасанхүү гишүүнтэй хэр хамтарч ажиллаж байна?
-О.Баасанхүү гишүүн манай намын төлөөлөл байхаа болиод 3 дахь жилийнхээ нүүрийг үзэж байна. 2016 оны УИХ-ын ээлжит сонгуулиар манай намаас нэр дэвшиж Орхон аймагт ялалт байгуулсан. Тэр цагаас хойш нам дээр нэг ч харагдаагүй. Энэ хугацаанд Төрийн ордонд нэг удаа намын нэр ашиглаж, төрийн хамгаалалтад хурал зохион байгуулах гэж оролдсон ч бүтэлгүйтсэн.
-О.Баасанхүү гишүүнийг намын гишүүнчлэлээс хасах шийдвэр гарсан юм уу?
-Хяналт ёс зүйн хороо шийдвэр гаргадаг.
-“Түрээсийн орон сууц” хөтөлбөртэй холбогдуулан шүүхээс таныг торгох, төрийн албанд дөрвөн жил оруулахгүй байх шийдвэрийг гаргасан байсан. Энэ асуудал юу болж байгаа вэ?
-Анхан шатны шүүх руу буцсан. “Түрээсийн орон сууц” хөтөлбөрийг ТОСК, Сангийн яам, Барилгын яамны хамтарсан ажлын хэсэг гарч эхлүүлээд 1500 гаруй өрхийг төрийн түрээсийн орон сууцанд хамруулсан. Надад хувьдаа авсан, завшсан зүйл байхгүй.
П.ГОО
Оллоо.мн