Засгийн газрын өчигдрийн хуралдаанаар “Эрдэнэт” үйлдвэрт хийсэн шалгалтын дүнг хэлэлцлээ. Уг шалгалтаар “Эрдэнэт” үйлдвэрт 2,2 их наяд төгрөгийн зөрчил илэрсэн байгаа юм. Иймээс уг асуудлыг холбогдох байгууллагаар шалгуулахаар шилжүүлж байгаагаа Сангийн сайд өчигдөр хэвлэлийнхэнд мэдэгдсэн.
Тэгвэл энэхүү шалгалтаар илэрсэн хамгийн ноцтой гэмээр нэг зөрчил нь “Эрдэнэт” үйлдвэр өөрийн хөрөнгөөр барьж, ашиглалтад оруулсан эмнэлгээ Японы хөрөнгө оруулалттай компанид “бэлэглэсэн” байна.
Тодруулбал, Эрдэнэт үйлдвэр 64,9 тэрбум төгрөгөөр эмнэлэг байгуулсан. Дараа энэ эмнэлгээ “Медипас” компанид шилжүүлсэн байгаа юм.
Гэрээнд Японы эрүүл мэндийн менежментийг нэвтрүүлэх, “Эрдэнэт” үйлдвэрийн ажилчдад хөнгөлөлттэй нөхцөлөөр эрүүл мэндийн үйлчилгээ үзүүлэх, “Эрдэнэт” үйлдвэрээс оруулсан хөрөнгийг Японы тал эргүүлэн төлөх гэсэн заалттай.
Улмаар Японы тал 18 жилийн хугацаанд “Эрдэнэт” үйлдвэрт эмнэлэг байгуулсан хөрөнгийг буцаан төлөх, гурван жилийн хугацаанд 200 ортой хэвтэн эмчлүүлэх эмнэлэг байгуулах үүрэг хүлээжээ. Ийнхүү өөрийн хөрөнгөөр барьсан эмнэлгээ япончуудад менежментийн хувьчлалаар өгчихсөн. Зүгээр л бэлэглэчихсэн.
Орхон аймгийнхан төдийгүй хангайн бүсийнхэнд үйлчлэх, олон улсын жишигт хүрсэн оношлогоо эмчилгээний төв болгоно гэсэн ТЭЗҮ-тэй тус эмнэлгээр ийнхүү бусдын хөрөнгө болсон байна. Үүнийг “Эрдэнэт” үйлдвэрийн удирдлагууд хийсэн байна. Эрхэм удирдлагуудын зүгээс өөрийн хөрөнгөөр барьсан эмнэлгээ хувийн компанид шилжүүлэхдээ “бидний гаргасан зардлыг буцааж төлөх” гэсэн шаардлагыг л тавьсан байгаа юм. Орон нутгийн иргэдийн хувьд сүүлийн үеийн тоног төхөөрөмж бүхий эмнэлэгтэй болсон нь сайн зүйл. Гэхдээ энэ эмнэлгийг заавал хувьд шилжүүлэх шаардлага байсан уу?
П.АНИР
Оллоо.мн