Барилга угсралтын ажлын гүйцэтгэгчээр Санжат ХХК ажиллаж төлөвлөгөөний дагуу товлосон хугацаандаа ашиглалтад хүлээлгэн өглөө. Туршилт, тохируулга, угаалга шахалт, тест хийх ажил бэлэн болсон байна.
Усан сангийн ойр орчмын айлууд нэг км гаруй газраас ундны усаа зөөдөг байна. Иргэдийн зүгээс ундны усны худагтай болох хүсэлтийг ихээр тавьж байгааг төсөл хэрэгжүүлэгчдийн зүгээс хотын захирагчид дуулгаж байв. Хотын захирагчийн зүгээс усан сангаа түшиглээд 2-3 худаг байгуулах ажлыг хийнэ гэв.
Нийслэлийн Засаг дарга бөгөөд Улаанбаатар хотын захирагч С.Амарсайхан “Улаанбаатар хотын хамгийн чухал амин сүнс болсон цэвэр усны хангамжийн асуудлыг шийдэж, Сэлбэ, Дамбадаржаа дэд төвийн Цэвэр усны усан санг ашиглалтад оруулж байна. Энэ усан сан ашиглалтад орсноор ойр орчмын айл өрхүүд цаашлаад ирэх жилээс хэрэгжүүлж эхлэх орлогод нийцсэн орон сууцны үндсэн дэд бүтцүүдийн нэг. Энэ төслүүд хэрэгжиж эхэлснээр Улаанбаатар хотын барилгажих ажил эрчимтэй үргэлжлэх боломж нь бүрдэж байна. Усан сангийн барилгын ажлыг чанарын өндөр түвшинд, түргэн шуурхай гүйцэтгэж ашиглалтад хүлээлгэн өгч байгаа Санжат ХХК-ийн хамт олонд талархлаа илэрхийлье” хэмээлээ.