Энэ сарын 19-ний өдөр 33 хүний суудалтай Дотоод хэргийн их сургуулийн ажилчдын зорчиж явсан том оврын автобус Ар гүнтийн давааны орчимд осолдож, долоон хүн амь насаа алдаж 30 гаруй хүн гэмтэж, эмнэлэгт хүргэгдсэн харамсалтай хэрэг гарсан.
Урьдчилсан байдлаар тухайн автобусны жолооч ямар нэг согтууруулах ундааны зүйл хэрэглээгүй бөгөөд жолооч "автобус огт тоормосгүй болсон учраас осол гарсан" гэх мэдүүлгийг өгөөд байгаа юм.
Тэгвэл ТЦА-ны мөрдөн шалгах газар энэ хэргийг шалгаж байгаа бөгөөд ослын дүгнэлт гараагүй байгааг мэдээллээ. Харин гэмтсэн иргэдийн биеийн байдлын талаар ГССҮТ-өөс тодруулахад “Манай эмнэлэгт 7 хүн эмчлүүлж байна. 31 хүнээс 10-ыг нь ТТАХ эмнэлэг рүү шилжүүлсэн бусад эмчлүүлээд гарсан” гэх мэдээллийг өглөө. Харин ТТАХ эмнэлгээс гэмтсэн хүмүүсийн биеийн байдал ямар байгаа талаар тодруулахад “Энэ талаар ямар нэг мэдээлэл өгөхгүй байхыг үүрэг болгосон” хэмээн мэдээллээ.
Эх сурвалжийн мэдээллээр уг автобусанд тус сургуулийн жолооч, тогооч гээд үйлчилгээний ажилчид зорчиж явсан байдаг. Эдгээр ажилчид нь сургуулийнхаа 85 жилийн ойн баярын тэмдэглэж явах үедээ ийнхүү харамсалтайгаар осолдсон. Жолоочийн зүгээс автобус тоормосгүй болсон гэх анхны мэдүүлэгтэй өгсөн бөгөөд бүрэн бус техникээр хол замд гарах зөвшөөрлийг хэн өгөв гэх асуулт урган гарч байгаа юм. Учир нь ДХИС бол тусгайлсан чиг үүрэг бүхий хүчний байгууллагуудын боловсон хүчин бэлтгэдэг сургууль. Бүх сургалтын хэлбэр нь тусгай тактик бэлтгэлээр явагддаг. Хууль эрх зүй аюулгүй байдлын хувьд өндөржүүлсэн бэлтгэлтэй байгууллага байх ёстой, үүрэгтэй. Гэвч энэ үүргээ биелүүлээгүйгээс болж долоон хүний алтан амь үрэгдээд байна. Хэн хариуцлага хүлээх вэ?
О.ОНОН