ЦЕГ-ын захиалгаар "Хууль сахиулах-1" 250 албан хаагчийн орон сууцны төслийг "Бавгар групп" ХХК хариуцан ажиллаж байна. Энэ ажил 2015 онд барилгын ажил эхэлсэн байна. Одоогоор “А” блокийн барилгын ажил 2019 оны хавар ашиглалтад орсон бол B блокийн барилгын ажил сар шинийн өмнө хүлээлгэн өгөхөөр ажиллаж байсан ч ямар нэгэн барилгын ажил явагдахгүй байгаа аж. Учир нь ажлын хэсэг буюу "Хууль сахиулах-1" хотхоны ажлын хэсгийн ахлагч Б.Цогтбаяр тэргүүнтэй төрийн албан хаагчдаас үүдэн B, Г блокийн барилгын ажил зогсоод байгаа юм.
Энэ талаар “Бавгар групп” ХХК-ийн захирал Х.Оюун “Намайг Х.Оюун гэдэг. Би "Бавгар групп" ХХК-ийн захирлын ажлыг 2018 оны нэгдүгээр сараас эхлэн хийж байгаа. Мэдээлэл хийх болсон шалтгаан нь төрийн албан хаагчид яагаад авилга аваад сурчихсан, авлига нь хууль шиг үйлчилдэг болчихсон юм бэ, авах ёстой юм шиг нэхдэг, гэм буруугүй байсан ч гэм буруутай болгочихно гэх байдлаар дарамтлан сүрдүүлдэг байдлыг илчлэх гэсэн юм. , "Бавгар групп" ХХК-ийн ЦЕГ-ын захиалгатай "Хууль сахиулах-1" 250 албан хаагчийн орон сууцны төслийг хариуцан 2015 онд барилгын ажил эхэлсэн.Ингээд 2017 оны 12 дугаар сарын 30-нд ээж маань авто ослын улмаас таалал төгссөн. Ингээд миний би ээжийнхээ ажлыг үргэлжлүүлсэн. Миний мэдэхээр 2015-2017 онд ажлын хэсэг нэртэй хэсэг хурандаа нар 927 сая төгрөгийг арматур буулгасан нэртэй авсан байгаа. Үүнээс болоод манай компанийн санхүү хүнд байдалд орж эхэлсэн. Бид ээжийнхээ хийж байсан ажлыг үргэлжлүүлж дуусгахын тулд банк болон ББСБ-аас өндөр хүүтэй зээл авч ажлаа үргэлжлүүлсэн. Гэтэл 2018 оноос эхлэн хурандаа Б.Цогтбаяр ээжтэй чинь ярьсан яриа байгаа иймээс ашиглалтад орсон пентахаусаас хоёрыг /зах зээлийн үнэлгээгээр тэрбум орчим төгрөгийн үнэлгээтэй/ ашиглалтад ороогүй байрнаас 30 ширхгийг үнэгүй өг гэсэн. Маш их мөнгө. Гэтэл би энэ мөнгөө ажил хийсэн хүмүүсдээ өгмөөр байна. Гэтэл “чи миний нэхсэн мөнгийг өгөхгүй бол танай ажлыг саатуулна, солино, чи ажлаа төлж чадахгүй шоронд явна, чи миний үгээр бай” гэдэг. Цагдаагийн алба хаагч, албаны дарга хүнийг яллаад шоронд явуулчихдаг юм уу, үгүй биз дээ. Би хууль зөрчөөгүй. Би ажил хийсэн туслан гүйцэтгэгчдээ мөнгө өгөх ёстой биз дээ. Барилга барихаар төрийн бүх байгууллагатай харьцдаг. Бүгд мөнгө нэхдэг. Маш олон компаниуд ажлаа хийхийн тулд төрийн албан хаагчдад мөнгө өгдөг. Дарга нарт нь мөнгө өгөхгүй гэх бүрт маргаан дэгддэг. Нэхсэн байр пентахаусыг нь өгч чадахгүй гэхэд чиний нөхцөл байдлыг ойлгоод 320 сая төгрөг бэлнээр авъя. Надад тийм мөнгө байхгүй. Тангараг өргөсөн төрийн албан хаагч биднийг хамгаалах ёстой хуулиар биднийг дарамтлаад байгаа юм бэ” гэлээ.
Ийнхүү "Бавгар групп" ХХК-ийн удирдлагыг санхүүгийн дарамтад оруулах, төслийн санхүүжилтийг гацаах, цагдаагийн албан хаагчдад буруу ташаа мэдээллээр төөрөгдүүлэх замаар төслийг зогсоох, барьцаалсан үйлдлүүдийг хурандаа Б.Цогтбаяр нь удаа дараа явуулсаар байгааг холбогдох газруудыг анхааралдаа авахыг хүссэн юм.
Сонирхуулахад, Б.Цогтбаяр хурандаа ЦЕГ-ын Сургалтын төвийн даргаар ажилладаг. 2016 онд хурандаа цол хүртсэн нэгэн аж.
О.ОНОН