Ирэх өдрүүдэд улстөрчдийн ааш аяг, сонин содон үйлдлүүд сонгогч олны нүд, сонорыг баясгана. Тэд ямар дүрд хувирч, ямар драм тоглохыг таахад бэрх. Сайн охин, сайхан хүү, халамжит хань, хайрлам сайхан аав гээд цахим орчинд нэр дэвшигчдийн төрх, зан араншин, үг үйлдэл үлгэрийн баатрын дүрээр үргэлжилж байна. Энэ зуур эсрэг дүрүүд мэр сэр гарч ирнэ. Тухайлбал, хотын дарга асан Э.Бат-Үүл, УИХ-ын гишүүний бүрэн эрх нь түр түдгэлзсэн Н.Номтойбаяр нар юм. Тэд энэ сонгуулиар “өшөө авагч”-ийн дүрээр өрсөлдөнө.
Улаанбаатар хотын захирагч, Нийслэлийн Засаг дарга асан Э.Бат-Үүл 2020 оны сонгуульд бие дааж нэр дэвших болсноо зарласан. Ингэхдээ тэрбээр "Манай намын "жинхэнэ" дарга З.Энхболд мэтийн ардчиллын дайснуудтай тэмцэхээр УИХ-ын сонгуульд бие дааж нэрээ дэвшүүлэхээр шийдэж хүсэлтээ өглөө. Миний намыг Ардчиллын эсрэг турхирч байгаа хүмүүстэй тэмцэхийн тулд бие дааж нэр дэвшихээс өөр аргагүй. З.Энхболд хаана нэр дэвшинэ, би тэнд очиж өрсөлдөнө” хэмээн мэдэгдсэн. Э.Бат-Үүл даргын хувьд сонгуульд ялалт байгуулахаас илүү намаа аврах, З.Энхболдыг “унагаах” том сонирхолтой. Өнгөрсөн хугацаанд З.Энхболдын зүгээс Э.Бат-Үүлийн нэр хүндэд халдсан хэмээн шүүх цагдаа дээрээ тулцгаасан. Харин одоо сонгуулийн нэг тойрог өрсөлдөж, хүчийг үзэхээр шийдсэн бололтой юм.
Тэгвэл энэ долоо хоногт Э.Бат-Үүл баатарын араас Н.Номтойбаяр Ц.Нямдорж сайдыг дуэл “дуудлаа”. Тэр мягмар гарагт Л.Мөнхбаясгалангийн “Цензургүй яриа” нэвтрүүлэгт оролцохдоо “Биеийн амрыг бодож Дорнод руу явахгүй. Харин Монголын төрд хэрэггүй гэж үзэж байгаа Ц.Нямдорж мэтийг зайлуулах гэж би Хан-Уул дүүрэгт нэр дэвшинэ. Хууль зүй дотоод хэргийн сайд Ц.Нямдоржийн тойрог дээр би өрсөлдөнө. Би нэр дэвшсэн газар нь очиж өрсөлдөнө" хэмээн мэдэгдлээ.
Ийнхүү төрийн эрх барих дээд байгууллагад сонгогдож хууль батлалцах эрхмүүд “өшөө авах” хүслээ гүйцэлдүүлэхээр сонгуульд нэр дэвшихээ мэдэгдлээ. Гэвч төрд төрийн хүн хэрэгтэй болохоос биш өшөө авагчид хэрэггүй гэдгийг сануулах нь илүүц биз.
О.ОНОН