Танилц: Сүхбаатар аймгаас нэр дэвшигчдийн ХОМ

Сүхбаатар аймаг 2016 оны сонгуулиар нэг мандаттай байсан бол энэ жилийн сонгуулиар хоёр мандаттай тойрог болсон. Тус аймаг МАХН-аас  сэтгүүлч Ч.Үл-Олдох, Н.Лутбаяр, АН-аас Ж.Батсуурь, Н.Ганибал, МАН-аас  З.Энхтөр, Т.Ганди нарын хүмүүс нэр дэвшин өрсөлдөхөөр болоод байна. 

Засаг дарга асан Ж.Батсуурийн үл хөдлөх 2 тэрбумаар үнэлэгдэж байна 

Сүхбаатар аймгийн Засаг дарга Ж.Батсуурь АН-аас нэр дэвшихээр 100 сая төгрөгийн дэнчингээ тушаажээ.  Түүний хувьд 2008-2016 хүртэл найман жил аймгийн Засаг даргаар ажилласан нэгэн. Аймгийн Засаг дарга байхдаа 21 аймгийн засаг ноёдоос хөрөнгө орлогоосоо тэргүүлж байв. Харин одоо дөрвөн жилийн дараа тэрбээр хөрөнгөө хэрхэн мэдүүлсэн талаар сонирхуулъя. 

Ж.Батсуурийн хувьд өөрөө жилийн 72 сая төгрөгийн орлоготой, гэр бүлийн гишүүд нь 25 сая төгрөгийн орлоготой. Хоёр орон сууц, нэг хашаа байшин, нэг үйлчилгээний зориулалтаар ашигладаг газартай нэг авто гражтай. Эдгээр нь 2 тэрбум 161 сая төгрөг. 136 сая төгрөгөөр үнэлэгдэх хоёр машинтай,  135 сая төгрөгөөр үнэлэгдэх 135 адуутай, Датуком ХХК-ийн 49 хувийг эзэмшдэг гэжээ. Сүүлийн 10 гаруй жилийн турш төрийн албанд тасралтгүй ажилласны үр дүнд тогтмол 100 шахам сая төгрөгийн орлоготой амьдардаг Засаг ноён асан ийнхүү Төрийн сэнтийг мөрөөдөж, нэр дэвшлээ. 

Н.Ганибал 108 адуутай 

Сүхбаатар аймгийн боксын холбооны тэргүүн Н.Ганибал гэх хөрөнгөлөг эр Сүхбаатар аймагт нэр дэвшихээр намдаа хандиваа өгсөн байна. Түүний хувьд гэр бүлээрээ 400 шахам сая төгрөгийн орлого жилдээ олдог  гэж байгаа. Зургаан орон сууц, нэг зуслангийн байшин, хоёр авто зогсоолтой. Эдгээрийн үнэлгээ  тун хачирхалтай тоо гарна. Бүх л бүтэн 7 үл хөдлөхийн үнэлгээ анхаарал татаж байгааг хэлэхэд илүүц биз. Тэрбээр мөн 2 жип машинаа мөн л 11 сая төгрөгөөр үнэлжээ. Нийт нэр дэвшигчдийн жишгээр хурдан удмын адуутай. Тодруулбал, Н.Ганибалынх 108 адуутай үүний 40 хурдан удмынх гэж байгаа. Мөн 12 үхэртэй үүний хоёр сайн үүлдрийнх, 120 хоньтой. 60 сая төгрөгийн хадгаламжтай. МОСМЕП ХХК, Ардчилал таймс сониныг эзэмшдэг. 

Засаг даргын суудалд туршлагаараа гологдсон З.Энхтөр 

Өнгөрсөн 2016 оны сонгуулиас хойш Сүхбаатар аймагт улс төрийн тогтворгүй байдал үүсч,  маргаан тэмцэл, жагсаал цуглаан тасрахгүй байгаа юм. Энэ дуулиан шуугианаар З.Энхтөр  гэх нөхөр Засаг даргаар томилогдсон байна. Тухайн үедээ төрд ажилласан туршлагагүй хэмээн гологдож явсан нэгэн. Төрийн албаны тухай хуульд зааснаас Засаг дарга нь төрийн албанд гурваас доошгүй жил ажилласан туршлагатай байш шаардлага тавигддаг ч З.Энхтөр энэ шаардлагыг хангаагүй юм. Ийнхүү гологдсон дарга хоёр жилийн дараа ажлаа хүлээлгэн өгсөн. 

Тэгвэл энэ удаад МАН-аас УИХ-ын сонгуульд нэр дэвших эрхээ олж авсан байна. Түүний хувьд мөн л толгой баячуудын нэг. З.Энхтөрийнх жилийн тэрбум шахам төгрөгийн орлоготой, нэг орон сууц, нэг үйлчилгээний зориулалттай газартай. Үүнийг 950 сая төгрөгөөр үнэлжээ. 260 төгрөгийн үнэлгээ бүхий 2 автомашинтай. 127 адуутай үүнээс 58 нь хурдан удмынх, 125 хоньтой. Эдгээр нь 266 сая төгрөгийн үнэлгээтэй. 2 тэрбум 365 сая төгрөгийн үнэлгээ бүхий үнэт эдлэлтэй. Хоёр жилийн өмнө түүний үнэт эдлэл 940 сая төгрөгөөр үнэлэгдэж байсан бол өнөөдөр бараг гурав дахин нэмэгдсэн байх юм. Мөн Засаг дарга байхда хоёр компанитай байсан бол өнөөдөр Энержи лэнд прожект ХХК, Смолл сайз апартмэнт прожект ХХК, Натур партнерс ХХК  гэх компаниудыг эзэмшиж байна. 

Т.Ганди хатагтайнх ямар нэг компанигүй ч тэрбумын орлоготой 

“Төмөр хатагтай” Т.Ганди Сүхбаатар аймагт нэр дэвшинэ. Түүний хувьд 2012-2016 онд Монгол Улсаас Унгар улсад онц бөгөөд бүрэн эрхт элчин сайдын албыг хашиж байгаад УИХ-ын 2016 оны сонгуулийн өмнө эх орондоо  ирж, МАН-ын сонгуулийн сурталчилгааны багт ажилласан. Харин одоо өөрөө нэр дэвшихээр болсон байна. 

Түүний ХОМ-ийг танилцуулъя. Т.Ганди хатагтай гэр бүлийн хамт жилийн тэрбум гаруй төгрөгийн орлого олдог. Нэг орон сууц, нэг зуслангийн байшин 2 автозогсоолтой. Эдгээр нь 510 сая төгрөгөөр үнэлэгдэж байна. 129 сая төгрөгийн үнэлгээ бүхий 2 автомашинтай.44 сая төгрөгийн үнэт эдлэлтэй. 82 сая төгрөгийн хадгаламжтай ч ямар нэг компанитай, гэхдээ жилийн маш өндөр орлоготой. 

 

О.ОНОН

 

Бусдад түгээх
  • gplus