Энэ оны эхэнд Чингэлтэйн Засаг даргаар томилогдсон Н.Батсүмбэрэл орон нутгийн сонгуульд тус дүүргийн 16 дугаар тойрогт нэр дэвшинэ.
Н.Батсүмбэрэлийн хувьд Түүх-Нийгмийн Ухааны багш мэргэжилтэй ч эзэмшсэн мэргэжлээрээ ганц ч жил ажиллаагүй. Тэрбээр оюутны холбоогоор дамжуулан намын гишүүн болсон нэгэн. Бүр тодруулбал нийслэлийн МАН-ын хороонд улс төрийн ажилтнаас ажлын гараагаа эхлүүлж, НАМОХ-ны Ерөнхий нарийн бичгийн дарга, МҮХАҮТ-д хэлтсийн дарга, Ерөнхий нарийн бичгийн даргын зөвлөх гэх мэт жилдээ хэд хэдэн албан тушаал сэлгэсэн нь ч байна. Н.Батсүмбэрэлийн хувьд нэг ажлын байранд 1-2 жил ажиллавал дээд амжилт. Багш мэргэжилтэй ч ганц ч жил энэ мэргэжлээрээ ажиллаагүй гэдгийг дээр дурдсан. Гэхдээ хачирхалтай тэрбээр Монголын Залуу багш нарын холбооны дэд ерөнхийлөгч гэх том албан тушаалтай. Ер хаана л сонгуульт ажил байна түүнд Н.Батсүмбэрэлийн нэр явж байдаг тухай намынхных нь яриа оргүй хоосон биш бололтой. Тогтвор суурьшилтай ажиллаж үзээгүй түүний намтарт Чингэлтэй дүүргийн Засаг даргын орлогчоор нэг жил ажиллаж байсан “туршлага” ч бий.
Ийнхүү ажлыг баруун солгойгүй сэлгэсэн тэрбээр өнгөрсөн 2016 оны сонгуулиар нийслэлийн ИТХ-д сонгогдсон. Харин одоо дахин нэр дэвших эрхээ аваад байна.
Түүний ИТХ-д сонгогдсоноос хойш АТГ-т мэдүүлсэн ХОМ-ийн хэсгээс нь танилцуулъя.
Н.Батсүмбэрэл нь жилийн 62 сая төгрөгийн орлого олдог. Харин гэр бүлийн гишүүд 16 сая төгрөгийн жилийн орлоготой, 208 сая төгрөгийн үнэлгээ бүхий нэг орон сууцтай, 80 сая төгрөгийн үнэлгээтэй хоёр машинтай, 59 сая төгрөгийн үнэлгээ бүхий малтай гээд хурааж хуримтлуулсан зүйл багагүй. НИТХ-ын төлөөлөгчдийн жишгийн дагуу Н.Батсүмбэрэлд ч бас эзэмших эрхтэй хоёр газар бий. Жирийн иргэнд бол бараа сураггүй газар ийнхүү нийслэлийн удирдах түвшнийхэнд хоёроос дээш байдаг нь бараг л жишиг гэхэд буруудахгүй.
Түүний хувьд Нью Эйдос, Дасаб гэх хоёр компанитай. НИТХ-ын төлөөлөгч болохоос өмнө дансандаа таван сая төгрөгтэй байсан тэрбээр 2019 оны ХОМ-тээ дансандаа 55 сая төгрөгийг хуримтлуулж чадсан гэдгээ мэдүүлжээ.
Ийнхүү багш мэргэжилтэй Н.Батсүмбэрэл нам дагасны хүчээр ам тосдож явна. Боломжтой бүхий л албан тушаалд томилогдож, бэл бэнчингээ ч зузаатгаад авсанаас харахад МАН түүнд багагүй зүйл “өгчээ”.
О.ОНОН
Оллоо.мн