Хадгаламжийн даатгалын корпорацийн гүйцэтгэх захирлаар ажилладаг Х.Бум-Эрдэнэ нь өөрийгөө орон сууцны дэмжлэгт хамруулах тушаал гарган дэд захирлаараа гарын үсэг зуруулж баталгаажуулан 45 сая төгрөгийн дэмжлэгийг авсан баримт олон нийтэд ил болсон. Х.Бум-Эрдэнэ нь корпорацид тогтвор суурьшилтай, банк санхүүгийн салбарт өндөр үр бүтээлтэй ажилласан тул ийнхүү өөрийгөө урамшуулжээ. Үүгээр зогсохгүй эрүүл мэнддээ ч бас онцгой анхаардаг ажээ. Шангри-ла зочид буудлын нэг давхарт байрлах Намастэ иогийн сургуулийн сарын төлбөрт 30 сая төгрөг шилжүүлжээ.
Хадгаламжийн даатгалын корпораци нь Монголбанкны харъяа байгууллага юм. Монголын Хадгаламжийн даатгалын корпораци нь "Банкин дахь мөнгөн хадгаламжийн даатгалын тухай хууль"-ийн хүрээнд төрөөс үүсгэн байгуулсан ашгийн төлөө бус хуулийн этгээд бөгөөд хадгаламжийн даатгалын үйл ажиллагааг эрхлэн явуулах зорилгоор 2013 оны зургаадугаар сарын 14-ний өдөр үүсгэн байгуулагдсан. Банкууд харилцагчдын өмнөөс Хадгаламжийн даатгалын корпорацид хураамж төлөн, сан бүрдүүлдэг бөгөөд банк татан буугдсан тохиолдолд хадгаламж эзэмшигчийн тухайн банкин дахь төгрөг ба валютын нийт 20 сая хүртэл төгрөгийн хадгаламжийг нөхөн олгох үйлчилгээ үзүүлдэг байгууллага юм.
С.ЦОГ
Нэвтрэх