Хууль зүй дотоод хэргийн яамнаас Эрүүгийн хуульд нэмэлт өөрчлөлт оруулахаар албан ёсны сайт дээрээ олон нийтийн санал авч байгаа. Эрүүгийн хуульд оруулах нэмэлт, өөрчлөлтөд дурдсанаар “Хүний нэр төр, алдар хүнд, хуулийн этгээдийн ажил хэргийн нэр хүндэд халдаж гутаах, эсхүл олон нийтийг төөрөгдүүлэх, эсхүл айдаст автуулах зорилгоор хортой, илтэд худал мэдээллийг хэвлэл мэдээллийн хэрэгсэл, эсхүл олон нийтийн мэдээллийн сүлжээний хэрэгсэл ашиглан тараасан, эсхүл илтэд худал мэдээлэл болохыг мэдсээр байж түгээсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорих цаг хүртэл хугацаагаар нийтэд тустай ажил хийлгэх эсхүл 1-6 сар хүртэл хугацаагаар хорино” гэжээ.
Иймээс Эрүүгийн хуулийн 13.14 дэх заалттай холбоотой нэмэлт өөрчлөлтийн асуудлаар МСНЭ болон бусад мэргэжлийн холбоод, сэтгүүлчдийн төлөөлөл ХЗДХ-ийн сайд Х.Нямбаатартай уулзаж шаардлага хүргүүлсэн байна. Энэ үеэр ХЗДХ-ийн сайд Х.Нямбаатар энэ хуулийн төслийг өргөн бариагүй учраас ямар ч шаардлага биелүүлэхгүй гэдгээ мэдэгдлээ.
Мөн тэрбээр "Хэвлэл мэдээллийн эрх чөлөөний тухай хуулийг нэн яаралтай хэлэлцүүлэхээр ХЗДХЯ ажиллж байна. Бүх хэвлэн нийтлэгчдийн эрх ашгийг хамгаалсан хууль байх ёстой. Энэ хуулиар Хэвлэлийн зөвлөл гэсэн бие даасан байгууллага ажиллана. Хэвлэлийн зөвлөл бусдын нэр төр, алдар хүндийг гутаан доромжилсонтой холбоотой бүх гомдлыг шийднэ. Тухайн редакц болон хэвлэн нийтлэгчийн залруулга гаргахыг шаардсан шийдвэр гаргана. Энэ шийдвэрийг биелүүлээгүй тохиолдолд Эрүүгийн хуулд заасан эрүүгийн хариуцлага хүлээнэ. Алдаа оноотой мэдээллээ хүлээн зөвшөөрөөд залруулга гаргавал асуудал дуусгавар болно. Алдаагаа зөвшөөрч, залруулга гаргаагүй тохиолдолд Эрүүгийн механизм ажиллана.
Хэвлэл мэдээллийн байгууллага гэдэгт зөвхөн редакцтай байгууллагыг томьёолох нь явцуу юм. Өнөөдөр хүн бүр блог хөтөлдөг, фэйж хөтөлдөг, фэйсбүүк твиттер хэрэглэгч болсон. Энэ хүмүүсийг бүгдийг хэвлэл мэдээллийн байгууллагын эгнээнд нэгдэж оръё гэсэн хүсэлтийг нь хүлээж авч, өргөтгөсөн хурлаас Хэвлэлийн зөвлөлийг байгуулдаг байх эрх зүйн зохицуулалтыг оруулахаар ажиллаж байна” гэлээ.
О.ОНОН
Оллоо.мн