“Цагдаагийн ерөнхий газрын даргын 218 тоот тушаалаар эргүүл жижүүрийн үүргийг 24 цагаар гүйцэтгэдэг албан хаагчдын хоногийн хоолны зардлыг 3600 төгрөг байхаар тогтоосон байна. Мөн өндөржүүлсэн бэлэн байдалд ажилласан, хээрийн сургуулилтад хамрагдсан хүмүүст 24 цагийн турш хоолны зардлыг 5000 төгрөгөөр тооцдог. Гэтэл нэг ялтан өдөрт 12400 төгрөгөөр татвар төлөгчдийн мөнгөөр тэжээсээр байна” гэх мэдээлэл цахим хуудсаар идэвхтэй цацагдаж байна.



Үнэхээр цагдаагийн албан хаагч 24 цаг үүрэг гүйцэтгэсэн мөртлөө хоолны зардал гэж 3600 төгрөг авдаг бол асуудалтай. Гэвч хоолны зардлыг нэмэх боломж манайд бий билүү. Боломж байхгүй гээд ял эдэлж буй хүмүүсийн хоолны зардлыг хасах тухай яриад ч хэрэггүй. Тэд чинь алдаа гаргасан ч гэсэн хүн шүү дээ. 12400 төгрөгөөр давтсан мах, тансаг рестораны хоол зооглоод сууж байдаг гэж бүү бодоорой.

Гэхдээ л үүрэг гүйцэтгэж буй цагдаагийн албан хаагчаас илүү хоол иддэг бололтой. 24 цаг үүрэг  гүйцэтгэж буй цагдаагийн хоолны зардал 3600 төгрөгөөр хязгаарлагдахгүй. Тиймээс л авлига, хээл хахуулийн эхний шат энд цэцгэлж байна хэмээн иргэд тайлбарладаг. Энэ нь ч үнэний ортой. Тэгвэл цагдаагийн хоолны зардлыг яах вэ. Цаашид төсөв хэмнэх нэрээр хассаар байх уу.