Засгийн газрын бүрэлдэхүүнд өөрчлөлт оруулахыг Байнгын хороо дэмжлээ
УИХ-ын Төрийн байгуулалтын байнгын хорооны өнөөдрийн хуралдаан 9 цаг 05 минутад 52.6 хувийн ирцтэй эхэлж, Засгийн газрын бүрэлдэхүүний тухай хуульд өөрчлөлт оруулах тухай болон холбогдох бусад хуулийн төслүүдийн хэлэлцэх эсэх тухай асуудлыг хэлэлцэв. Байнгын хорооны хуралдаанд Ерөнхий сайд Н.Алтанхуяг оролцлоо.

  Энэ талаарх хууль санаачлагчийн илтгэлийг УИХ-ын гишүүн, Засгийн газрын гишүүн, Монгол Улсын сайд Ч.Сайханбилэг танилцуулсан юм.

Монгол Улсын эдийн засгийн хөгжлийг эрчимжүүлэх, Засгийн газрын үйл ажиллагааны хөтөлбөрийг хэрэгжүүлэх ажлыг зохион байгуулах, эдийн засаг, нийгмийн хөгжлийг хангах зорилгоор Засгийн газрын яамдын бүтцийг оновчтой тогтоож, чиг үүргийн давхардалгүй ажиллах үүднээс Сангийн яам, Эдийн засгийн хөгжлийн яамыг нэгтгэн Сангийн яам; Уул уурхайн яам, Эрчим хүчний яамыг нэгтгэн Геологи, уул уурхай, эрчим хүчний яам; Барилга, хот байгуулалтын яам, Зам, тээврийн яамыг нэгтгэн Дэд бүтцийн хөгжлийн яам болгон өөрчилж, нийт 13 яамтай ажиллахаар Засгийн газраас Монгол Улсын Засгийн газрын тухай хуульд нэмэлт, өөрчлөлт оруулах тухай, Засгийн газрын бүтцийн тухай хуульд өөрчлөлт оруулах тухай хуулийн төслүүдийг санаачлан боловсруулж өргөн мэдүүлсэн. Улсын Их Хурал эдгээр хуулийн төслийг энэ сарын 07-ны өдрийн чуулганы нэгдсэн хуралдаанаар хэлэлцээд Сангийн яам, Эдийн засгийн хөгжлийн яамыг нэгтгэн Сангийн яам; Уул уурхайн яам, Эрчим хүчний яамыг нэгтгэн Уул уурхай, эрчим хүчний яам; Барилга, хот байгуулалтын яам, Зам, тээврийн яамыг нэгтгэн Зам, тээвэр, барилга, хот байгуулалтын яам, Гадаад харилцааны яамыг Гадаад харилцаа, эдийн засгийн хамтын ажиллагааны яам болгож өөрчлөн баталсан юм.

  Иймээс холбогдох хуулиудад оруулсан дээрх өөрчлөлттэй уялдуулан Засгийн газрын бүрэлдэхүүнд Гадаад харилцаа, эдийн засгийн хамтын ажиллагааны сайд, Зам, тээвэр, барилга, хот байгуулалтын сайд, Уул уурхай, эрчим хүчний сайд байх талаар өөрчлөлт оруулах саналыг Засгийн газраас өчигдөр өргөн мэдүүлсэн. Хуульд дээрх өөрчлөлтийг оруулснаар Монгол Улсын Засгийн газар нь Ерөнхий сайд, Шадар сайд болон 14 сайдын бүрэлдэхүүнтэй ажиллах юм. Үүнд:

   1.Монгол Улсын Ерөнхий сайд;

   2.Монгол Улсын Шадар сайд;

   3.Монгол Улсын сайд, Засгийн газрын Хэрэг эрхлэх газрын дарга;

   4.Байгаль орчин, ногоон хөгжлийн сайд;

   5.Гадаад харилцаа, эдийн засгийн хамтын ажиллагааны сайд;

   6.Сангийн сайд;

   7.Хууль зүйн сайд;

   8.Батлан хамгаалахын сайд;

   9.Боловсрол, шинжлэх ухааны сайд;

   10.Зам, тээвэр, барилга, хот байгуулалтын сайд;

   11.Соёл, спорт, аялал жуулчлалын сайд;

   12.Уул уурхай, эрчим хүчний сайд;

   13.Үйлдвэр, хөдөө аж ахуйн сайд;

   14.Хөдөлмөрийн сайд;

   15.Хүн амын хөгжил, нийгмийн хамгааллын сайд;

   16.Эрүүл мэндийн сайд.

Мөн Монгол Улсын Засгийн газрын тухай хуульд нэмэлт, өөрчлөлт оруулах тухай, Засгийн газрын бүтцийн тухай хуульд өөрчлөлт оруулах тухай хуулиуд батлагдсантай холбогдуулан боловсруулсан зарим хуульд өөрчлөлт оруулах тухай хуулийн төслүүдэд Засгийн газрын бүтцэд өөрчлөлт орж, зарим яамны нэр, эрхлэх асуудлын хүрээ өөрчлөгдсөнтэй нийцүүлэн холбогдох салбарын хуульд заасан яам, Засгийн газрын гишүүний эрхлэх асуудал, нэр томъёог жигдлэхээр тусгажээ.

Хэлэлцэж буй асуудалтай холбогдуулан Байнгын хорооны гишүүд Монгол Улсын Ерөнхий сайд болон Засгийн газрын Хэрэг эрхлэх газрын дарга нараас асуулт асууж тодруулан хуулийн төслүүдийг хэлэлцэх эсэх талаар саналаа хэллээ. Ингээд санал хураалт явуулахад Байнгын хорооны хуралдаанд оролцсон 13 гишүүний 12 нь буюу 92.3 хувь нь Засгийн газрын бүрэлдэхүүний тухай хуульд өөрчлөлт оруулах тухай болон Засгийн газрын бүтцийн тухай хуульд өөрчлөлт оруулах тухай хууль батлагдсантай холбогдуулан зарим хуульд өөрчлөлт оруулах тухай хуулийн төслүүдийг хэлэлцэхийг дэмжлээ.

Эдгээр хуулийн төслүүдийн хэлэлцэх эсэх асуудлыг чуулганы өнөөдрийн үдээс өмнөх нэгдсэн хуралдаанаар хэлэлцэж шийдвэрлэх юм.

Г.Уянга
оллоо.мн
Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.