М.Ганзориг: Постер зургийн орчныг хиймэл оюун ухаан илүү тодотгосон

Өдөр ирэх тусам хурдтай хөгжиж буй техник технологийн хөгжил нь биднийг илүү шинэ, онцгой, содон ертөнц рүү хөтөлсөөр. Үүний нэг буюу хиймэл оюун ухаан ашиглаж зураг зурах технологи урлагийн салбарт нэвтэрээд багагүй хугацаа өнгөрчээ. Уг технологийг ашиглаж  постер зурагаа бүтээсэн Монголын анхдагч “Бэхэн зүрх” уран сайхны кино удахгүй үзэгчдэд хүрэх гэж буй. Тиймээс энэ удаагийн “Залуус” буландаа хиймэл оюун ухаан ашиглаж тус киноны постер, дизайн дээр ажилласан М.Ганзоригийг онцолж байна. Тэрбээр гэрэл зурагчин, график дизайнерч мэргэжилтэй бөгөөд “Урлан” студийн үүсгэн байгуулагч юм.

 

-Киноны постер, дизайнд хиймэл оюун ухаан ашигласнаар ямар онцлог давуу талтай вэ?

-Нэгдүгээрт, шинэ технологийг ашигласнаараа илүү онцлог. Текстийг агуулгаар нь зураг болгож гаргах үйл явцыг хиймэл оюун ухааны тусламжтай хийх боломжтой. Өөрийн төсөөллөө бичгэн хэлбэрт буулгаж,  зураг болгон хөрвүүлэх боломжийг энэ технологи олгож байгаа юм. Киноны сурталчилгаанд ашиглах албан ёсны  постер  дээр хиймэл оюун ухаанаар дамжуулж, жүжигчдийн арын харагдах орчныг тодотгож өгсөн. “Бэхэн зүрх” киноны постер зурагаа драм, хийсвэр загвар бүхий харуулахыг зорьсонтой нь хиймэл оюун ухаан дахь өгөгдлүүд нийцэж өгсөн юм. Уг киноны өгүүлэмж нь номтой холбоотой. Гол дүр нь зохиолч. Тиймээс анх постер зурагныхаа санааг номоор бүтсэн орчин бүхий хотын дээгүүр хүмүүс нисэж буйгаар буулгасан юм. Тэгээд хиймэл оюун ухаан дээр номоор бүтсэн хот  гэж хийгээд хайсан. Энэ үед өдөр, нар жаргасан, эсвэл шөнийн хот байх уу гэсэн сонголт хийх боломжийг хиймэл оюун ухаан олгосон. Энэ үед үүссэн нэг асуудал нь тухайн зургийг ойроос харахад хэчнээн номоор бүтсэн хот гэж харагдах хэдий ч холоос харвал энгийн нэг хот шиг харагдсан. Тиймээс хиймэл оюун ухаан дээр дахин орчноо сольж номын сан дотор хүмүүс нисэж байгаагаар постер зурагаа хийсэн. Хэрэв фото хэлбэрээр номын сангийн орчны зургийг авч байгаад, хүмүүс нисэж буй дүрслэлээ оруулсан бол хүмүүст хиймэл  харагдах байсан байж магадгүй. Харин хийсвэр зүйлээс гаргаж ирсэн дүрслэлтэй холбож оруулснаар уран зураг мэт харагдаж буй нь хүмүүст энгийн тусах байх.

-Нисэж байгаа хүмүүсээ хэрхэн дүрсэлж гаргасан бэ?

-Өндөр, намхан сандал, ширээ өрж тавьж байгаад хүмүүсээ доош нь харж хэвтүүлж буйгаар нисэж байгаа дүрслэлээ гаргасан. Дараа нь боловсруулалт хийхдээ зурагныхаа ширээ,  сандлыг нь арилгаад, хүмүүсээ үлдээгээд хиймэл оюун ухаанаар хийсэн орчин дээрээ  эвлүүлсэн.

-Тухайн зургийн өгөгдөл бүхий бичвэрийн түлхүүр үгээ хиймэл оюун ухаанд оновчтой оруулснаар хүссэн зурагаа буулгах боломж бүрдэх нь ээ?

-Тийм ээ. "Google" дээр хүмүүс хайж байгаа зүйлээ оновчтой зөв үгээр оруулахгүй  бол хайсан зүйл гарч ирдэггүйтэй адил. Хиймэл оюун ухаан дээр байгаль гээд хайхад элсэн цөл,  ногоон ой гээд  ямар  зураг ч гарч ирж магадгүй.  Хэрэв ойн дүрслэл гаргаж ирэхийг хүсэж байгаа бол ой, байгаль гээд бичихэд ойтой холбоотой зурагнууд боловсруулагдаад гарч ирнэ гэсэн үг. Олон түлхүүр үгнийхээ  алинд илүү төвлөрөх вэ гэдэг нь чухал. Жишээ нь, талд давхиж байгаа морь гэж бичээд хайхад морины нуруун дээр тал газрыг дүрсэлсэн зэрэг эсрэгээр гарч ирж болно. Тиймээс талд давхиж байгаа  морь гарч иртэл олон дахин оролдлого хийх хэрэгтэй.

-Хиймэл оюун ухааны тусламжтай зургийг буулгахад хэр хугацаа зарцуулдаг вэ?

-Хиймэл оюун ухаан хичнээн текст оруулснаас шатгаалаад  хугацаа нь янз бүр. Нэг удаа уншуулахад ихдээ 30 секунд л болно. Эхний  текстүүд жижиг хэлбэрээр гарч ирдэг. Тухайн текст боломжтой байна гээд томоор харахыг хүсвэл нэг минутын дараа илүү нарийвчлалтай гарч ирэх боломжтой.

-Та “Тамгагүй төр” жүжгийн постерын зураг, дизайн дээр ажилласан гэсэн үү?

-Би 40 гаруй киноны постер хийсэн. Өмнө нь “Тамгагүй төр” жүжиг,  “Тэнгэрийн чоно” кино зэрэг бүтээлийн постер, дизайн дээр хиймэл оюун ухааныг ашиглаж байсан. Гэхдээ албан ёсны постер бол биш. “Тамгагүй төр” жүжгийн хувьд жүжигчдийнхээ дүрийг ашиглахгүйгээр  жүжгийнхээ агуулгаар постер хийсэн.  Уг жүжиг хаан үхэхгүйгээр төгсдөг. Харин зохиол дээрээ бүх дүрүүд үхээд дуусдаг. Зохиолын дагуу хааны үхэл, төрийн уналтыг хаан сэнтий дээр сууж байгаа араг ясаар дүрсэлсэн.  Тэгээд постероо хийхийн тулд 50 гаруй оролдлого хийсний дараа хүн харахад ойлгогдохоор зохиомж гаргасан. Үүн дээр нэмэлт дизайн, текстээ бичиж оруулж байсан.

-Энэ технологи нь мэргэжлийн зураачдад уран бүтээлээ хийхэд ямар давуу талтай вэ?

-Хиймэл оюун ухаанаар зураг зурах технологи гарч ирснээс хойш зураач мэргэжил хэрэггүй болж байгаа юм шүү гэсэн шүүмж нийгэмд өрнөсөн. Гэвч ирээдүйд  өнөөгийн нийгэм дэх зүйлс хэрхэн хувирч өөрчлөгдөхийг тааварлашгүй.  Мэргэжлийн бус хүмүүст өөрт хэрэгтэй энгийн зургийг хиймэл оюун ухааны тусламжтай буулгах боломжтой ч мэргэжлийн зураачдад илүү өндөр түвшинд, богино хугацаанд зурах боломжийг бүрдүүлэх байх.  Учир нь зураачдад төсөөлөн бодох, дүрслэлийн зохиомжоо гаргах гээд төрөлхийн өгөгдөл байгаа учраас хиймэл оюун ухааныг ашиглаад өмнө хийж байсан ажлаа өндөр түвшинд хийх боломжтой. Жишээлбэл, зураачдад загвар зураг гаргах үйл явцыг илүү хурдан болгоход, мөн дахин давтагдашгүй сонирхолтой зохиомж гаргахад тусална. Зураач тухайн бүтээлээ хийхийн тулд эхлээд загвар зургаа тархиндаа төсөөлөөд цаасан дээр буулгадаг.  Харин хиймэл оюун ухаан олон төрлийн  загвар зургийг  богино хугацаанд харуулна.  Тэндээс төсөөлөөгүй загварыг олж харах боломжтой гэсэн үг. Тиймээс  зураачдын хувьд цаг хугацаа хэмнэх, шинэ санаа олоход туслах давуу талтай. Цаашдаа хиймэл оюун ухаан дүрслэх урлагийн салбарт  тодорхой хэмжээний орон зайг эзлэх байх. Бусад улсад хиймэл оюун ухаан ашиглаж зурсан зургийн уралдаан, мөн уран бүтээлдээ хэр ухаалагаар ашигласан байна гэсэн ажил хэрэгжээд эхэлсэн.

-Хүний зургийг хиймэл оюун ухаанаар зураг болгон буулгах боломжтой юу?

-Интернэтээс хайлт хийхэд  тухайн хүний зураг олноороо  гарч ирж байвал хиймэл оюун ухаан тэр зурагнуудаас ашиглаад  зөвхөн тухайн хүний нэрийг бичэхэд ижил дүр төрхтэй зурагуудыг гаргаж ирэх чадвартай. Гэхдээ хиймэл оюун ухааны тусламжтай зурсан хүний дүр төрх харагдах байдлаас танигдах боловч зөв төрхтэй биш байдаг. Тиймээс хиймэл оюун ухааны тусламжтай хүний дүр төрхийг буулгах нь одоохондоо төгс хөгжөөгүй байгаа. Зургийг бичгэн хувилбарт буулгадаг технологи хэдэн жилийн өмнө гарсан.  Одоо текстийг зураг болгож хувиргах нь дэлгэрч байна. Мөн текстийг видео болгох гэсэн  дараагийн  технологийн эхний хөгжүүлэлт хийгдээд үр  дүнгүүд нь гарч байгаа юм билээ.
 

“Зууны мэдээ” сонин
П.Амгалан
 

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.