Амьгүйн дээр амаа мэддэггүй албатуудаа сольж үз, Ерөнхий сайд аа. Өөрийн чинь “ивээлт” Цахим хөгжил, харилцаа холбооны яамны дэд сайдын суудалд заларсан Б.Болор-Эрдэнийг огцруулахыг шаардсан иргэдийн тоо нэмэгдсээр байгааг та харж буй биз.
 
Үндсэн хуулийн сууоь ухагдахуунаа ч мэддэггүй хүнийг монголчууд  харин ч өнөөг хүртэл хүлцэнгүй байж албан тушаал ахиулсаар ирсэн. Үндсэн хуулийн 14.2-т “Хүнийг үндэс, угсаа, хэл, арьсны өнгө, нас, хүйс, нийгмийн гарал байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно” гэж заасан байдаг.
 
Гэтэл таны ивээлд багтсан гэх Б.Болор-Эрдэнэ олон улсын “Ирээдүйн хөрөнгө оруулалтын санаачлага” чуулганы тайзан дээр гадныхны дэргэд жишим ч үгүй ард иргэдийг нас, боловсролоор нь ялгаварлан гадуурхаж, дэлхий нийтэд цацаж сууж.
 
Тухайн үед тэр Харилцаа холбоо, мэдээллийн технологийн газрын дарга гэх албан тушаал хашиж байсан ч дэлхий даяаршиж, цахимжиж буй энэ үед чухал албан тушаал мөнөөсөө мөн.
 
Өнөөдрийн Монгол Улсыг бий болгохын тулд Б.Болор-Эрдэнийн эцэг, эх биш юм аа гэхэд тухайн цаг үеийн сэхээтнүүдийн ихэнх нь орост боловсрол эзэмшиж, үлдсэн хэсэг нь оросын “школ”-оор сурч, боловсорч, ажиллаж ирсэн.
 
Гэтэл тэдний босголцсон өнөөгийн төрийн зардлаар буюу  Боловсролын зээлийн сангийн зээлээр өөр оронд боловсрол эзэмшиж ирчхээд өрөө ч төлөөгүй байж, бусдыг ад үзэж өөлж, гоочилдог ийм сэтгэхүйтэй төрийн өндөр албан тушаалтан байж болохгүй.
 
Түүнийхээр бол Монгол Улс хөгжин цэцэглэхэд ахмадууд гай болж байгаа юм гэнэ. Гэтэл дэргэд нь зэрэгцээд сууж буй гадныхны насыг бус туршлагыг ашиглан хөгжиж байгаа, хөгждөг ч юм.  Тухайлбал Б.Болор-Эрдэнэтэй хамт байгаа Английн Хөрөнгө оруулалтын сайд Лорд Жерри Гримстон 73 настай бол Их Британийн хөрөнгө оруулагч тэрбумтан, бизнесмэн Росчайлд 68, АНУ-ын сэтгүүлч Жон К.Дефтериос 61 настай. Тэгвэл тэдгээр эрхмүүд Б.Болор-Эрдэнийхээр бол үеэ өнгөрөөчихсөн “юмнууд” бололтой.


 
Үнэндээ бол олны хэлдгээр “Ерөнхий сайдын” гэх тодотголтой Б.Болор-Эрдэнэ анх удаа Үндсэн хууль зөрчиж, монголчуудыг доромжилж байгаа юм биш.
 
Тэрбээр өмнө нь ковид-19-ийн цар тахлын үеэр буюу 2021 оны 9 дүгээр сард “Цахим үндэстэн-2021” шоу зохион байгуулж халдвар хамгааллын дэглэмийг зөрчиж байсныг монголчууд мартаагүй.
 
Номыг нь сураагүй бол номхныг нь сур гэж үг бий. Үндсэн хуулиа мэдэхгүй бол амаа хамхиж байхыг албатууддаа хэлж, заааж өг Ерөнхий сайд аа.
 
Хүний эрхийн мэдрэмжгүй хүмүүсээ төрийн албанаас үдсэн шигээ, хөөрхөн гэгддэг хүүхнээ ч бас Монголын төрөөс зайлуул.