Дашчойлон хийдийнхэн Солонгос лам нартай хамтран өчигдрөөс уншлага, мөргөлөө эхэлсэн. Бодь модын дэргэд олон жил баясалгал үйлдэн суусан эр илт туулсан бурхны хутгийг олсон бэлэгдэлтэй учраас энэ өдөр урьдын үйлээ эргэцүүлэн зул, хүж асааж, суварга шүтээнд мөргөн сэтгэлээ ариусгадаг. Улс орноо түвшин сайхан байлгахын төлөө энэ өдөр бүх нийтээрээ залбирч ирээдүй хойчийнхоо зам, мөрийг засдаг уламжлалтай. Сэтгэлээ ариусгах өдөр учраас мах, улаан идээг тэвчин буян үйлддэг. Дээр үед 1000 гэлэн ном хурах зэрэг томоохон үйл хийдэг байлаа гэж Дашчойлон хийдийн багш Б,Жамбал ярьсан. Та шүтлэггүй ч бай энэ өдөр аравхан хором өөрөө өөртөйгөө ярилцан, ойр дотны хүмүүс, байгаль эхэд учруулсан гэмээ цагаатгахыг лам нар танд зөвлөж байна.