-Та 1994 оны Монголын сайхан бүсгүйн (монгол эрдэнэ) өргөмжлөлтэй. Тэр үеийн дурсамжаасаа хуваалцаач. Тэмцээнд орох саналыг хэн тавьж байв. Сэтгэл дундуур үлдсэн зүйл бий юу?
-Анх шилмэл загвараас тэмцээнд орох санал тавьж байхад нэг их ойлгоогүй зүгээр л загварын уралдаан л гэж ойлгож байлаа. Харин дараа нь тэмцээнд орж байх явцдаа л ойлгож авсан. Тэр үед үнэхээр гоё гоё охид орж байсан ч түрүүлнэ гэдэгтээ итгэлтэй байсан даа. Тэр үед Оюунтуяаг 1-рт ороход сэтгэл гонсгор үлдсэн ч одоо харин харамсдаггүй ээ.
-Монголчууд эмэгтэй хүнийг 25-н нас хүрээд жинхэнэ сайхан бүсгүй болдог гэж үздэг. Гэтэл одоо Монголын сайхан бүсгүйн тэмцээн сайхан бүсгүй биш арван хэдтэй охидын тэмцээн болсон юм шиг санагддаг. Тэгвэл таны бодол?
-Би ч бас тэгж боддог. Нас зааж 18-25 хүртэл гэвэл зүгээр юм шиг. Аав ээж нь 16, 17-той охиддоо мисс болгох гэж яардаг юм байлгүй хөтлөөд ирдэг. Гэтэл тэр охид нь яагаа ч үгүй түүхийгээрээ байдаг.
-Эрдэнэтуяа гэгч бүсгүйг хувь хүн талаас нь тодорхойлбол?
-Янз янзаар тодорхойлж болох юм. Хувь хүнийхээ 80%- д нь би өөртөө таалагддаггүй. Гэхдээ бусад хүнд миний дургүй 80%-д минь дуртай байж болох юм. Яагаад гэвэл би биеэ тоосон хүн биш. Миний хувьд би бусдыг хүндэлж байж өөрийгөө хүндлүүлдэг. Ямар ч хүн миний жижиг өрөөнд намайг гээд зориод ирэхэд би түүнд сэтгэлээрээ, өөрийн чадах бүхнээрээ туслаад л гаргадаг.
-Таны их хөдөлмөр ч гэдэг. АМжилтыг гол түлхүүр чинь юу вэ?
-Би нэг их хөдөлмөр ч биш. Боломж тохироо нь бүрдээгүй болоогүй ч тэр үү өөрт байгаа нөөцийнхөө 30%-ийг л ашиглаж чадаж байна. Илүү дайчин бол надаас их зүйл гарна. Ялангуяа би өөрийгөө их нөөцтэй гэж боддог.
-Хүүхэд байхдаа таньд дуурайж хүндэлдэг хүн байв уу?
-Yнэнийг хэлэхэд надад тэгж шүтэн бишэрч, даган дуурайдаг хүн байгаагүй. Аа харин аав ээж, эгчийгээ л хайрлаж хүндэлж явдаг. Тэгээд ч миний үед ОРТ, Монгол ТВ л гардаг байлаа. Тэдгээрээс одоогийнх шиг мэдээлэл авах боломж байдаггүй байсан. Өөрийнхөө зангаараа өссөн дөө.
-Та өнөөдрийн амьдралдаа сэтгэл хангалуун байдаг уу?
-Yгүй. Яагаад гэвэл би хүссэн өндөрлөгтөө арай хүрээгүй байна. Тэгээд ч хүний мөрөөдөл хязгаар байдаггүй шүү дээ. Өнөөдөр бол окей. Харин маргааш юу болохыг хэн ч хэлж мэдэхгүй. Гэхдээ би бол долоо хоногийн дараа дэлхий сүйрнэ гэвэл шинэ шоу хийх гээд явж мэдэх хүн. Yзэхгүй бол хохино шүү гээд л…(инээв)
-Шоу гэснээс та хэр бизнесмэн эмэгтэй вэ?
-Одоогоор би зөвхөн загварын ертөнц дэх бизнест л хүч сорьж байна. Гэхдээ жилийн дараа өөр бизнест хүч сорьж магадгүй. Тэр үед чи дахиад асуугаарай л даа.
-Бидний яриа өөрийн эрхгүй бизнес рүү халиад орчихлоо. Монголын дизайнеруудын холбоо гээд эрх бүхий байгууллага оршин тогтносоор байхад Эра төвийг яаж ийм амжилттай өрх тусгаарлуулчихав?
-Монголын дизайнеруудын холбоо бидний эцэг эх л гэсэн үг. Бид охидууд шиг нь байсан. Цагийн эрхээр охин хүүхэд эрд гарах ч юм уу эсвэл ямар нэгэн байдлаар өрх тусгаарладаг шүү дээ. Тэгээд ч Монголын дизайнеруудын холбоо анх надад анх энэ сэдлийг бий болгож өгсөн л дөө.
-Тэгвэл Эра төвийн давуу онцлог талыг асууя л даа.
-МИний загвар өмсөгчид ур чадвараараа илүү, зураг авахуулахдаа хүртэл мэргэжлийн түвшинд ойртсон байдаг. Нөгөө талаар хүүхдүүдийнхээ тоогоор ч олон. За тэгээд мэдээж хэрэг арга барилын хувьд өөр байлгүй яахав. Мөн ТВ-ээр гарч байгаа үнэтэй рекламны 60%-д нь манай хүүхдүүд тоглодог гэхээр бахархмаар санагддаг.
-Хоёулаа ярианыхаа сэдвийг өөрчлөөд эргээд Эрдэнэтуяа гэгч бүсгүйн хувийн нууц руу өнгийе. Таньд ер нь ямар эрчүүд таалагддаг вэ?
-Өөрийнхөөрөө чөлөөтэй, нээлттэй эрчүүд таалагддаг. Харин ухаантай царай гаргадаг, эсвэл худлаа соёлтой зан гаргах гээд япчихсан эрчүүд таалагддаггүй.
-Таны дайсан?
-Залхуурах. Би их залхуу.
-Хамгийн их айдаг зүйл?
-Ямар нэг зүйл эхлүүлбэл амжилтанд хүрэхгүй байх вий гэж их айдаг. Гэхдээ нэгэнт эхэлсэн эцсийг нь үзэж байж сая нэг санаа амардаг. Шатсан ч шатаагүй ч хамаагүй гээд л зүтгэдэг.
-Таныг ямар нөхцөл байдал уйлахад хүргэдэг вэ?
-Би ТВ-ээр гэрч байгаа өнчин хүүхдүүдийг хараад уйлдаг. Хажууд хүн уйлж байвал дагаад л уйлна. Ингэж уйлдаг маань эмэгтэй хүний уян сэтгэлтэй холбоотой болов уу. Харин намайг доромжилж, үл тоомсорлож байхад улам ч хатууждаг.
-Таныг ажаад байхад реклам шоунд нэг их оролцоод байдаггүй. Цаг зав чинь болохгүй байна уу? аль эсвэл…
-Хөлс мөнгө төлсөн компанитай л хамтарч ажилладаг. Гэхдээ миний тариф бусдаас өндөр л дөө. Түүнээс гадна энэ тэндээс реклам шоуны санал ирэхэд би өөрийгөө биш шавь нараа тоглуулахыг хүсдэг. Залуу хүүхдүүдэд боломж олгохыг хүсдэг гэх үү дээ.
-Хүний итгэл хэр даадаг вэ?
-Би өөрийгөө харин ч итгэл даадаг гэж боддог шүү. Гэсэн ч хүсээгүй ч гэсэн алдаж эндэх юм байлгүй л яахав. Тийм тохиолдолд итгэлийг нь эвдсэн хүн байвал энэ мөчийг далимдуулан уучлалт хүсье.

Цаг зав гарган ярилцсан таньд баярлалаа.