Хоёр хоногийн өмнө буюу зургадугаар сарын тавны өдөр Ротари клубын 100 жилийн ойн нэрэмжит Хонх Монголд айлчилж, бас отгон Ротари клубын гишүүдэд батламж, тэмдэг, туг билэгдэл гардуулах ёслолын ажиллагаа Драмын эрдмийн театрын өмнөх талбайд боллоо. Уг арга хэмжээнд Монголын Ротари кулбууд багтдаг бүсийн төлөөлөгчид тухайлбал, Хонгконг, Макао, Өмнөд Солонгос, Австралийн төлөөлөгчид хүрэлцэн ирсэн байлаа. Нээлтийн ажиллагааны үеэр Ротари клубын гишүүд Монголын тахир дутуу иргэдийн байгууллагуудын үндэсний холбоонд 20 тэргэнцэр хандив болгон өгсөн юм. Монголд гурав хоногийн хугацаатай дамжин өнгөрөх уг хонхийг Ротари клубын бүсийн захирагч цохиж, Туул ротари клубын ерөнхийлөгч Д.Дорлигжавт цохиураа хүлээлгэн өгснөөр отгон ротари клуб энэ том байгууллагын бүрэн эрхт төлөөлөгч болсноо зарласан бэлэгдэл хэмээн үздэг уламжлалтай гэнэ. Мөн өдрийн орой Чингис зочид буудалд Туул ротари клуб нээлтийн баяраа тэмдэглэх ёслол цэнгүүн болов. Ёслол цэнгүүний ажиллагааг нээж Ерөнхийлөгч Д.Дорлигжав хэлсэн үгэндээ Олон улсын нэр хүнд бүхий энэ том байгууллагын эгнээнд нэгдсэн тэр өдөр маань ротари клубын 99 жилийн ойн өдөртэй тохиосонд бид тун билэгшээж байгаа билээ. Есийн тоог билэгшээдэг бидний хувьд 99 буюу арван нэгэн ес гэдэг илүү таатай сэтгэгдэл үлдээх нь ойлгомжтой. Улмаар 100 жилийн ойн их ажлын гараагаа дэлхий дахинаа хүргэх ротарийн Хонх-ыг дэлдэн сайн санааны их үйлсэд Монголчууд бид нэгдэн орсноо зарлалаа. Өөрөөр хэлбэл Монгол орны хөгжилд хувь нэмрээ оруулах нэгэн их үйлсэд анд нөхөд та нартайгаа мөр зэрэгцэн алхах болсондоо бид баяртай байна. Монгол улсынхаа төлөө зүтгэцгээе хэмээсэн юм.