Эдгээр ажиллагаануудын зөвхөн нэгийг нь л хууль зөрчөөд, жишээлбэл, өмгөөлөгчийг байлцуулалгүйгээр байцаалтыг явуулбал тухайн мэдүүлгийн үнэн зөв эсэхэд дараа дараагийн шатуудад эргэлзээ гарч, улмаар хэрэг будлиантах, тогтоол шийдвэр хүчингүй болох, өөрчлөгдөх нь олонтаа байна.

Хэрэг бүртгэлт, мөрдөн байцаалтын ажлын зохион байгуулалт
Хуульд зааснаар хэрэг бүртгэлтийн ажиллагааг хэрэг бүртгэгч, мөрдөн байцаалтыг мөрдөн байцаагч явуулах ёстой. Ээдрээ төвөгтэй болон ихээхэн хэмжээний ажиллагаа бүхий хэргийн мөрдөн байцаалтыг мөрдөн байцаагчдын хэсэг явуулж болох ба түүнийг мөрдөн байцаах албаны дарга томилж тогтоол гаргахаар хуулийн 183 дугаар зүйлд заасан. Үүнийг ажлын гарцаагүй шаардлагаар хуульд оруулсан гэж тайлбарлаж болох боловч, хэрэгт холбогдогсдын зүгээс хуульд зааснаар татгалзал гаргах эрхийг бодитойгоор хэрэгжүүлэхэд ихээхэн төвөгтэй байдлыг бий болгоно. Нэгэнт хэргийг мөрдөн байцаагчдын хэсэг явуулах учраас ганц нэг мөрдөн байцаагчийг татгалзлаа ч гэсэн эхнээс нь нэг удирдлагатай, нэг мэдээлэлтэй байсан ажлын хэсгийнхэнд бүрэн хэмжээгээр итгэхэд хэцүү болно. Тэр тусмаа хэргийн талаархи эцсийн шийдвэрийг зөвхөн хэсгийн ахлагч гаргах учраас бусад мөрдөн байцаагчдын оролцоо болон татгалзал нэг их нөлөөгүй юм.
Шинэ хуульд сэжигтнээр тооцох журмыг (хуулийн 35.1) тогтоосон атлаа ямар хугацаанд сэжигтнээр тооцогдох, өөрөө хэлбэл хэзээ дуусгавар болохыг тусгаагүй учраас хэргийг илэртэл, эсхүл хэргийг шийдвэрлэгтдэл сэжигтэн хэвээр байж, эрх нь байнга дарамт, заналхийлэлд байна гэсэн үг юм. Нэгэнт сэжигтэн гэж тооцогдсон учраас таслан сэргийлэх арга хэмжээ нь хүчингүй болоогүй, гадаад дотоод явахад мөрдөн байцаагчаас зөвшеөрөл авах ч юмуу, дуудсан цагт саадгүй ирэх гэх мэт үүргийг хүлээсээр байх болно.