Цагдаагийн алба хаагчийн ёс зүйн хэм хэмжээ.
2.1 Цагдаагийн алба хаагч хүний эрх, эрх чөлөөг хүндэтгэн хуулийн дээдэлж, шударгаар ажиллана.
2.2 Цагдаагийн алба хаагч нь албаны нэр төрийг цэвэр ариун байлгаж, түүний хөгжил бэхжилтэнд бодитой хувь нэмэр оруулж ажиллана.
2.3 Цагдаагийн алба хаагч нь мэдлэг боловсрол, сахилга хариуцлага зан байдлаараа иргэд олон нийтийн итгэл хүндэтгэлийг хүлээж ажиллана.
2.4 Цагдаагийн алба хаагч нь үүргээ гүйцэтгэх явцдаа олж мэдсэн төр, байгууллага, хувь хүний болон албаны нууцыг чанд хадгалж хууль ёсны шийдвэр гаргаагүй байгаа хэрэг маргааны тухай өөрийн санал бодлыг урьдчилан илэрхийлэх, олон нийтэд мэдээлэх амлалт өгөхийг хориглоно.
2.5 Алба хаагч нь Цагдаагийн байгууллагын нэгдмэл төвлөрсөн удирдлагын зарчмыг үйл ажиллагаандаа чанд мөрдөж, дээд байгууллага албан тушаалтнаас хуульд нийцүүлэн гаргасан шийдвэрийг ёсчлон биелүүлэхээс гадна нөхдийнхөө албаны ажилд хүндэтгэлтэй хандан тэдний үйл ажиллагаанд хөндлөнгөөс нөлөөлөхгүй байна.
2.6 Цагдаагийн алба хаагч нь албан тушаал, хуулиар олгосон эрх мэдлээ хувийн зорилгод ашиглах, албан үүргээ биелүүлсэнтэй холбогдуулан шан харамж бэлэг сэлт бусдаас авах, шахаж шаардах, ятгах, зуучлах, хуульд харш болзол тавих, албаны нэрээр түрүү барих, далайлган сүрдүүлэхийг цээрлэнэ.
2.7 Цагдаагийн алба хаагч нь хүнд суртал гаргах, иргэдийг чирэгдүүлэх, хүнлэг бус харьцах, эрх чөлөө эд хөрөнгөнд нь хууль бусаар халдах, танил тал харах, бусдын нөлөөнд автах, хувийн сонирхолоор болон харьяалалын бус хэрэг, маргаанд оролцохыг хориглоно.
2.8 Цагдаагийн алба хаагч нь боловсрол, мэргэжил, ажлын ур чадвараа байнгын дээшлүүлж зан төлөвийн муу зуршил, дутагдал гаргахгүй байна.
2.9 Цагдаагийн алба хаагч нь гэр бүл үр хүүхэддээ, халамж анхааралтай байж, ёс суртахууны нийтээр зөвшөөрөгдсөн хэм хэмжээг сахиж мөрдөхийг өөрийн журамт үүргээ гэж үзнэ.
2.10 Цагдаагийн алба хаагч нь байгууллагын өмч хөрөнгө, техник хэрэгсэл, эд зүйлс, албан хэрэгцээний мэдээ, материал, мэдээллийн санг албаны бус зориулалтаар ашиглахыг цээрлэнэ.
2.11 Цагдаагийн алба хаагчид
-дүрэмт хувцастай
-ажлын цагаар
-ажлын байранд согтууруулах ундааны зүйл хэрэглэхийг хориглоно.
