Гуанз, зоогийн газар, хүлээн авалт, хурал, аливаа албан ёсны байдалтай байгаа үед цэх шулуун сууж сандлынхаа тал, дөрөвний гурав хиртэй зайг эзлэн, ар түшлэгэнд нь налалгүй сууна. Түшлэгтэй сандал дээр гэдэргээ налж суух буюу хэвтэх бол гагцхүү ганцаараа байх үед болно. Олны дунд түшлэгээ налж хэвтэх зохисгүй.
Суухдаа хөлөө журамтай тавих чухал. Хөлөө ачиж сууж болох уу, эсвэл зохисгүй юу гэж олонтаа асуудаг. ХХ зууны эхээр хөлөө ачиж суухыг үнэхээр зохисгүй хэрэг гэж үзэж байна. Тэр үед эмэгтэйчүүд урт даашинз өмсч байсан. Бас дотуур хувцас ч урт байсан. Ингэхлээр хэрэв тэр үед эмэгтэйчүүд хөлөө ачиж суувал дотуур хувцас нь харагддаг байлаа. Харин эмэгтэйчүүд одоогийн хийц маягтай костюмтайгаа ингэж суувал зохисгүй юм байхгүй. Харин ялангуяа булчин шилбэ хэлбэр үзэмжтэй, гоё туфльтай бол ингэж суухад эвтэйхэн, зохимжтой харагдах болно. Харин тэгэхдээ эрэгтэй нь ч, эмэгтэй нь ч хөлөө ачиж суухдаа хүмүүс амарч байгаа буюу албан ёсны биш үед болох юм.
Харин нас ахмад буюу танихгүй хүний дэргэд бол албан ёсны биш үед л ингэж сууж болно. Хөлөө ачаад бас дээр нь хөлөө хөдөлгөж суух нь хэдийгээр эвтэй байж болох авч ингэж суух үзэмжгүй тул хэрэггүй.
Эмэгтэйчүүд суухдаа хоёр хөлөө яльгүй нугалан нэгийг нь ялимгүй урагш тавьж суувал аятайхан харагддаг. Тэгэхдээ хөлөө шилбээр нь зөрүүлж суувал суудал нь үзэмжтэй сайхан харагддаг. Харин ингэж зөрүүлэн урагш нь жийж суух бол зөвхөн амралтын үед болно. Өвдгөө алцайлган сууж болохгүй. Өвдгөө нийлүүлж хоёр улаа гадагш нь алцайлгаж суух бүр ч муухай.
Өөрийнхөө яаж сууж байгааг ажиж чандаж байх хэрэгтэй. Хүнтэй цуг байхдаа цаашаагаа харж суух зохисгүй. Харин үзвэрийн газар бол цөм урагш харж нэг зүг рүү харж суух нь мэдээж хэрэг. Олны дунд байхдаа ингэж /үзвэрээс бусад/ суувал цаад хүнээ эвгүй байдалд оруулна.