Хөнжлийнхөө хэрээр хөлөө жий гэсэн мэргэн үг байдаг. Дөрвөн алд даавуугаар костюм оёдог нэг ч оёдолчин байдаггүй. Гэтэл өөрийн хөрөнгийн чинээнээс хэтэрсэн бизнес эрхлэхийг санаархагчид олон байдаг.
Хөрөнгө чинээ бага байх тутам түүнийг бүрэн ашиглаж дээд зэргийн ашиг олох шаардлагатай. Анх удаа дэлгүүрийн эзэн болж байгаа хүн бүр барааны нөөцийг хэтрүүлдэг. Бүтэн жилийн туршид худалдах бараагаа нэг дор худалдаж авдаг. Тэгсний дараа тун удалгүй хөрөнгө, зээл эрж эхэлдэг.
Тэр өөрийн бололцоог хэтрүүлжээ. Хэрэв тэр хүн барааныхаа нийцийг адаглаад 3/2-ыг нэг сарын дотор худалдах боломжтой нөхцөлд түүнийг нийлүүлэгчээс авах ёстой гэдгийг ойлгосон бол санхүүгийн бэрхшээлд орохгүй байсан. Өөрөөр хэлбэл тэр өөрийн мэдэлд байгаа хөрөнгийг буруу зарцуулжээ. Үүний төлөө хэн нэг хүн хариуцлага хүлээж, тусламж үзүүлэх албагүй.
Бизнесийн сүйрлийн бүх тохиолдолд үндсэн шалтгаан нь ажил хэргийн мэдлэг, туршлага дутагдах явдал байдаг. Тэд юу хүсч байгаагаа бодохоос юу чадах тухайгаа боддоггүй. Тэд эхлээд том зүйлийн суурь тавихыг хичээдэг. Тэд өөрсдийн хөрөнгийг өөрийгөө баярлуулах сонирхлын үүднээс зарцуулдаг. Энэ бүхэн жирийн үнэн. Энэ бол хүний мөн чанар. Гэвч энэ бол бизнесийн хувьд буруу эхлэл.
Хэрэв хүний хөрөнгө бага бол энэ сул талаа хүн өөрөө нөхөх ёстой.
Тэр хүн хэрэгцээтэй бүхнээс хамгийн цөөн зүйлд мөнгө зарах ёстой. Тэр хүн эхлээд тоног төхөөрөмж, байр сууцны тохижилтод аль болох бага мөнгө зарах ёстой. Хүмүүс үүнийг сонсох дургүй байдаг. Аливаа хүн бизнес эхлэхдээ өөрөө хөрөнгийн 3/2 юм уу, түүнээс илүүг капитал болгодог.
Ингэж тэр өөрийн бололцооноос хэтэрсэн бизнес үүсгэдэг. Тэр хүн бизнесийн хүрээ хичнээн өргөн байвал төчнөөн их ашиг олно гэж боддог. Гэтэл энэ нь өргөн дэлгэрсэн төөрөгдөл мөн.
Ашиг өгөхгүй зүйлд мөнгө үрэх хэрэггүй. Хөрөнгөө түгжиж үхүүлэхээс үргэлж болгоомжлох ёстой.
Бизнесийг эхлэхэд гарааны цар хүрээ ямар ч ач холбогдолгүй. Аварга том царс мод өчүүхэн жижиг үрнээс ургадаг. Шинэ үйл ажиллагаа бүхэн туршилт байдаг болохоор амжилт олохын найдвартай баталгаа байхгүй үед их мөнгөөр аз туршиж болохгүй. Бизнесээ найдвартай болгохын тулд нийц сан хөмрөг хэрэгтэй. Бэрхшээл тохиолдвол түүнийгээ ашиглана. Ингэснээр дампуурлыг хаах цорын ганц нөхцөл бүрэлдэнэ.
Хамгийн жижиг аж ахуй ч гэсэн цаг ямагт дансандаа үлдэгдэл мөнгөтэй байх ёстой. Мөнгийг хадгалж сурах нь бизнесийн ертөнцөд сурвал зохих цагаан толгойн эхний үсэг мөн. Хувь хүн их биш хөрөнгөтэй байхад амжилт зөвхөн өөрөөс нь шалтгаална. Хэрэв тэр хүн шударга, ажилсаг, нийтэч харилцаатай бол эхлээд л амжилт олно. Хэрэв тэр хүн нэр алдартай, хүндэтгэл хүлээсэн байвал мөнгө өөрөө урсаж ирнэ. Бүх мөнгө бусдын халааснаас ирдэг юм шүү.
Бизнесмэн болгоомжлол, шуурхай чанарыг тэнцүүгээр хослуулах ёстой. Бизнес бага хэмжээтэй бол бэлэн мөнгөөр худалдаж авах хэрэгтэй. Тийм хүн өөрөө мөнгө зээлдэж авах буюу зээлээр өгч болохгүй. Түүнд өртэй буюу авлагатай хүн байх ёсгүй. Тэр худалдааны хорогдлын хувийг арилжаа бүхэндээ тооцоо ёстой. Гэхдээ зээлийн хүү болон бэлнээр тооцоохийсний ялгааг үргэлж бодох ёстой. Энэ ялгаа бол түүний цэвэр ашиг мөн.
Ажил хэргийн мэдлэггүй идэвхгүй хүмүүс эхлээд өр тавина, дараа нь дахиад зээл ав гэсэн дүрмээр амьдардаг. Энэ бол бэрхшээлийг давах чадваргүй, залхуу хүмүүсийн зам. Ийм хүмүүс бизнес эрхлээгүй нь дээр.
Тэднийг зээл аврахгүй. Тэд тогтмол цалинтай ажил хийсэн нь дээр.
Зээл авах цаг гэж байдаг. Цагийг нь олж зээл авна гэдэг ухаалаг мэргэн алхам.Өөрийн хөрөнгөнөөс 15 хувиас доошгүй ашиг олж чаддаг болсон нөхцөлд зээл авахад хангалттай туршлага бий болдог. Хэрэв тэр хүн өөрийн хөрөнгийн дөрөвний нэгээс илүүгүй зээл авч байвал мэргэн шийдвэр гаргаж байна гэсэн үг.