Хүүхдийг бие даан хувцас хунараа өмсөж, гар нүүрээ угаан, аав ээж, ах эгчдээ Сайхан нойрсов уу? гэж хэлүүлж сургавал зохино. Хүүхдүүд, насанд хүрэгсдэд шаардуулалгүйгээр Сайхан нойрсоорой, танилдаа Та сайн байна уу, Баяртай, аливаа зүйлийг хүсэхдээ Ажаам уу, хэн нэгэн ямар нэгэн юм өгөхөд талархдаг, зөвшөөрөлгүйгээр ширээнээс босдоггүй байх хэвшилд сургах хэрэгтэй.
Хүүхдийг дэг журам, нягт нямбай болгоход хялбар байдаг.
Хүүхдийг асгаж цутгахгүй, хог тарихгүй, ширээний бүтээлгээ бохирдуулахгүйгээр нямбай хооллож, дараа нь ам, гараа зөвхөн амны алчуураар арчиж сургах хэрэгтэй.
Зарим хүүхэд байшингийн болон орцын хананд элдэв зураг зурж сараачих, сурагчийн ширээ, үзүүлэнгийн материалд гамгүй хандах зэрэг байдлыг зөвхөн хүмүүжлийн дутагдлаар тайлбарлаж болох юм.
Хүүхдэд соёлч боловсон хэвшил олгох чухал нөхцөл бол хөдөлмөрийн хүмүүжил юм. Хүхдүүд өөрсдөө хөдөлмөр гэж юу болохыг ойлгосон цагт л эд юмсаа хямгадах болно. Иймээс цэцэг услах, тоос шороо арчих, хооллох, ширээ засах, гутал, хувцсаа цэвэрлэх, дэлгүүрээс ойр зуурын юм авахуулахаар явуулах гэх мэтийн ажилд хүүхдийг сургах нь зүйтэй.
Өдрийн дэглэм нь хүмүүжлийн их ач холбогдолтой юм. Хуваарийг хатуу баримтлах нь эмх цэгцтэй, ахилга баттай, тодорхой байдалд сургадаг. Хүүхдүүд тогтоосон цагтаа босож, хичээлээ давтаж, салхинд зугаалж, хооллож, унтаж байх ёстой.
Хүүхдийг зурагт, радио хэт шохоорхохгүй байлгахад анхаарч сайтар хянаж байх ёстой. Тэд бүхэл оройжин цэнхэр дэлгэцийн дэргэд суучихвал бусад ажлаа орхигдуулдаг. Мөн зурагт хэт их үзэх нь хүүхдийн неврозоор өвчлөх нэг шалтгаан болдгийг санаж байх хэрэгтэй. Хүүхдэд зориулсан тусгай программ нь тэдэнд ашигтай, харин олон цагаар алгасалгүй үзэх нь муугаар нөлөөлнө.
Хүүхдүүд ахмад хүмүүсийг хүндэлж, эцэг эх, ах эгч нартаа анхаарал тавьж, халамжилж байгаа нь тааламжтай байдаг.
Айл гэрийн дотор тайван, хэн ч уцаарлаж чанга дуугарахгүй, бие биедээ саад болж гомдоохгүй байх нь аятайхан байдаг. Энэ байдалд өөрийн зан байдлаар хүүхдийн хүмүүжилд нөлөөлж байдгаараа ахмадууд үлгэр дуурайл үзүүлж байх ёстой.
Хүүхэдтэй байнга эелдэг зөөлөн харьцаж, уурлахгүй, хараахгүй байхыг эцэг эхчүүдэд зөвлөж байна.