Шуугиан нь хүний эрүүл мэнд, хөдөлмөрийн бүтээмжинд муу нөлөө үзүүлдэг. Шуугиан ихтэй нөхцөлд ажилладаг хүмүүсийн ерөнхий өвчлөл шуугиан багатай үйлдвэрлэл дээр ажилладаг ажилчдынхаас 20-30 хувь их байдгийн дээр хөдөлмөрийн бүтээмж нь 10-20 хувь бага байдгийг судлаачид нотолжээ. Мэдрэлийн ядаргаа өвчин нэмэгдэх, хөдөлмөрийн бүтээмж буурах, түргэн ядрах, бие махбодийн эрхтэн системийн зарим ажиллагаа гажих шалтгааны нэг нь шуугиан мөн болохыг сүүлийн жилүүдэд хийсэн судалгааны дүн харуулж байгаа ажээ.
Шуугианы улмаас төв мэдрэлийн системийн ажиллагаанд гажуудал үүсдэг байна. Шуугианы өвчний үед мэдрэлийн системд эмгэг үүсэх онцлогтой. Тухайлбал зүрх судас, амьсгал, хоол боловсруулах эрхтний ажиллагаанд өөрчлөлт гардаг нь үүнтэй холбоотой. Шуугиан ихтэй нөхцөлд ажиллагсад толгой, зүрхний орчим өвдөх ба цочромтгой, ядрамтгай, нойрондоо муу болох зэрэг шаналгаатай байдаг. Мөн ийм нөхцөлд ажиллагсдын сонсгол мууддаг. Сонсголын эрхтэнд үйл ажиллагааны өөрчлөлт гарсан үед сонсгол сэргэх талтай. Харин сонсголын эрхтний эд эсэд органик өөрчлөлт гарсан үед сонсгол сэргэхгүй чих дүлийрэх өвчинтэй болдог.
Мэдрэлийн системийн өвчин, зүрх судасны өвчин, ялангуяа цусны даралт ихсэх буюу багадах өвчин гэх мэт өвчтэй хүмүүсийг шуугиантай ажилд оруулж болохгүй. Хүчтэй шуугианы нөлөөнд ажиллагсад мэдрэлийн эмч, чих, хамар хоолойн эмчийн дсипансерийн хяналтанд орох ёстой юм байна.