Yүнийг амьдралын хэм хэмжээ, хөгжлийн өндөр хурдац, мөн хүний мэдрэлийн ачаалал их болсноор тайлбарлах нь элбэг тохиолдож байна. Ийм нөхцөлд алжаалаа хэрхэн түргэн зуур гаргаж, ажлын чадвараа дээшлүүлэх вэ. Хэн нэгний нээж олсноор төв мэдрэлийн системийг түргэн сэргээж чадах зүйлийг кофе гэж үзэх болжээ. Ингээд дэлхий дахины сая сая хүмүүс кофены тусламжтайгаар өглөөгүүр нойрмог байдлаас гарч, өдөр оройн цагаар нэмэлт хүчээ авч байна гэж итгэх боллоо.
Гэхдээ кофе хортой биш байгаа. Зарим эмч нарын үзсэнээр Францын аугаа их зохиолч Оноре де Бальзак өөрийн ахархан наслах хугацаандаа хэмжээгүй их өтгөн кофе уудаг байсан нь цагаасаа өмнө ертөнцөөс халин одсон шалтгааны нэг болсон гэдэг тодорхой болжээ. Ямар ч байлаа гэсэн сүүлийн жилүүдэд эрүүл бие, эмгэгтэй биеийн аль алинд кофе ямар нөлөө үзүүлдгийг биологичид, эмч нар судлах боллоо.
Өнөөгийн байдлаар кофенд байдаг кофейн хүний цусны тусгай химийн нэгдэл болох серотонин гэгч бодисыг ихэсгэдэг бөгөөд энэ нь тархины судас хөдөлгөгч төвийг сэрэлд оруулдаг гэдэг нь батлагдсан гэж хэлж болно. Yүний зэрэгцээ зүрхний булчингийн агших хугацааны хүч кофены нөлөөгөөр өсдөг ажээ. Ийм үйлчилгээ нь цусны даралт багатай хүнд сайнаар нөлөөлнө. Ялангуяа кофе уусны дараа бие нь сэргэлэн цовоо, идэвхжил сайтай болдог бол нэг хоёр аяга кофе уухыг хориглох учиргүй. Мөн кофены найрлаганд ордог зарим бодис хүний биед үүссэн өөх тослогийн зүйлийг задраадаг болохыг эрдэмтэд тогтоожээ.
Кофе хоол идэх хүсэл бага төрүүлдэг, өөрөөр хэлбэл өлсөж байгаа сэтгэгдэл төрүүлэхгүй болгодог гэдгийг ч бас батлах баримт байдаг. Кофе хүний цусан дахь сахарын хэмжээг багасгадаг бөгөөд үүгээр сахарын ачааллыг эсэргүүцэх хүчин болдог ажээ. Гэхдээ энэ нь хэт таргалсан юм уу, саахарын өвчинтэй хүмүүс кофе уувал зүгээр болно гэсэн үг биш ээ. Таргалах, саахарын өвчин хоёрыг зүрхний үйл ажиллагаа хэвийн биш болох, цусны судасны хана уян хатан байдал, нэвчих чанараа алдах өвчнүд дагалдах болзошгүй байдаг. Харин энэ тохиолдолд кофенд байдаг кофейн болон бусад нэгдлүүд муу нөлөө үзүүлэх болно.
Кофе зүрхний булчин, судас хөдөлгөх төвийн ажиллагааг идэвхжүүлэх нөлөө үзүүлдэг учраас цусны даралтыг түр зуур ихэсгэх бөгөөд хэтэрхий их уувал цусны даралт тогтмол өндөр байх болно. Цусны даралт ихтэй хүн 0.2 гр кофейн агуулсан хоёрхон аяга кофе уухад бие нь эрс мууддаг байна.
Кофег хичнээн удаа уух тоолон зүрхний цусан хангамжийн дутагдлын өвчин хүндрэх аюул төдий чинээ тулгардаг болохыг баталсан судалгаа ч хийсэн байна. Ийм учраас зүрхний цусан хангамжийн дутагдал, судасны хатуурлын өвчинтэй хүмүүс кофе ууж ерөөсөө болохгүй.
Жирийн цайны найрлаганд кофейн гэдэг бодис кофенд байдагтай бараг адилхан агуулагддаг боловч цай ууснаас болж зүрхний өвчин нөлөөлөх зүйл байхгүй гэдгийг судлаачид нээсэн байна. Тэгэхээр кофе дээрх өвчинтэй хүмүүст муугаар нөлөөлдөг шалтгаан зөвхөн кофейноор хязгаарлагдахгүй гэдэг дүгнэлт гарч ирнэ.
Харшлын өвчинтэй /аллергия/ болон В1 витамин хэрэглэхийг эмч зөвлөсөн хүмүүс кофе уухгүй байх нь дээр. Учир нь хүний биеийн арьсан дээр гардаг улайралт, бэржрүү мэтийг кофе үүсгэх нь олонтаа тохиолдож байгаагаас гадна кофены найрлаганд байдаг зарим бодис витамин В1-ийг задалдаг юм байна.
Аягахан кофе бэлдэж уухад өглөөний гимнастик хийх юм уу, дүүшинд орохоос бага хугацаа шаардагдах нь тодорхой боловч бидний бие махбодыг сэргэлэн цовоо болгож, ажлын чадвар дээшлүүлэх чадалтай биеийн тамирын дасгал хийж, усаар биеэ чийрэгжүүлэх нь хамгийн найдвартай идэвхжүүлэгч байх болно.