Зорилго
1.Бие махбодийн өвчин эмгэг бүхий хэсгийн үрэвслийг дарах
2.Биеийн хэсгүүдийн өвчинг намдаах
3.Арьсны судсыг өргөсгөн, улмаар рефлексийн замаар эмчилгээний үйлчилгээ үзүүлэх
Хэрэглэх заалт
Амьсгалын замын цочмог халдварууд, амьсгалын дээд замын үрэвсэлт өвчнүүд, гуурсан хоолойн ба мөгөөрсөн хоолойн багтраа, уушигны үрэвсэл, үе мөчний өвчнүүд, зүрхний бах, цусны даралт огцом ихсэх зэрэгт хэрэглэдэг. Гичийн гоюу нь хуурай үедээ арьсыг цочроох үйлчилгээгүй байдаг. Харин нойтон бол эфирийн тосны дэгдэлтээс болж арьсанд хүчтэй цочролыг үүсгэдэг. +60 хэмд цочроох үйлчилгээгээ алддаг тул хэт халуун усанд хэрэглэхгүй.
Гичийг хэрэглэх үед анхаарах зүйл
Хэрэглэх хугацаа, усны хэмжээ, хэм, усанд дүрж норгох хугацааг анхаарна. Гич тавих үед хорсох, өвдөх шинж илэрвэл шууд авна. Гичний үлдэгдлийг заавал бүлээн алчуураар арчиж авдаг. Нүд, амьсгалын замын салст бүрхэвч цочрохоос сэргийлж хуурай гичийг цацаж хэрэглэж болохгүй. Гич тавьж болох, тавьж болохгүй талбайг анхаарна. Цус алдалт, биеийн халуун 380-аас дээш байгаа үед, арьсны эмгэгтэй байх, хорт хавдраар өвчилсөн үед гичийг хэрэглэж болохгүй.

Наамал гич тавих
Бэлтгэх зүйл
1.12 см урттай, 8 см өргөнтэй наамал гич
2.40-45 хэмийн бүлээн ус
3.Бүлээн усанд базсан алчуур
4.Давхарлан ороох даавуу
5.Цаг
6.Түмпэн
Гардан хийх ажилбар
-Бэлтгэсэн зүйлээ өвчтөний дэргэд тавина
-Өвчтөнөө түрүүлэг нь харуулан хэвтүүлнэ
-Өвчтөний цамцыг шууж нурууг ил гаргаад дэр дэрлүүлнэ
-40-45 хэмийн халуун устай түмпэнд гичээ 5-10 секунд дүрнэ
-Норгосон гичээ гаргаж ирээд тавихаар сонгосон талбайд наана
-Алчуур болон даавуугаар давхарлаж бүтээгээд, хучлагыг нөмөргөнө. 10-12 минут байлгана.
-Хугацаа болмогц давхар боолтыг авч гичийг хуулан авна.
-Арьсан дээр үлдэж хоцорсон гичний хэсгийг бүлээн алчуураар арчиж цэвэрлэнэ.
-Өвчтөнг дулаан хучиж тайван амруулна.

Гичтэй ороолт хийх
Бэлтгэх зүйлс
1.Нунтаг гич
2.Гурил 30-50 гр
3.Жижиг сав
4.Цайны халбага
5.Зузаан алчуур
6.Савтай халуун ус
7.Вазелин
8.Даавуу 2 ш
Гардан хийх ажилбар
-Бэлтгэсэн зүйлээ авчирч өвчтөний ойролцоо тавина.
-Жижиг савандаа цайны халбагаар гич, гурил хоёроос ижил хэмжээтэй авч, дээр нь 40-50 хэмийн халуун ус хийж сайтар хутгана.
-Зутан хэлбэрийн өтгөн зуурмагнаасаа авч даавууны нэг тал дээр /урташ нь давхарлаж нугалсан 10-15 см хэмжээтэй/ захад нь хүртэл хүргэлгүйгээр жигд түрхэж даавууны нөгөө хэсгээр бүтээнэ.
-Арьсыг хэт цочроохоос болгоомжилж хуурай гичийг гурилтай хольдог бөгөөд хүүхдэд хэрэглэх бол 2-3 дахин их гурил холих хэрэгтэй.
-Өвчтөний ороолт хийх хэсгийг ил гаргаж бэлтгэсэн гичтэй даавуугаа тавьж өгнө.
-Дулаан алчуураар давхар ороож хөнжлийг нь нөмөргөнө.
-10-15 минут болсны дараа гичтэй ороолтоо авна.
-Гичтэй ороолт хийсэн тэр хэсгийн арьсыг бүлээн усаар норгосон алчуураар арчиж өгнө.
-Өвчтөнг салхи авахуулахгүй дулаан хучиж хэвтүүлнэ.