Байцаа чанахад эвгүй үнэр гарна. Чанах савандаа бага хэмжээний талхны үйрдсийг цэвэр алчуурт боож хийх буюу сахар хийвэл үнэр нь дарагдана.
Тамхины үнэрийг арилгахдаа цонхоо онгойлгож нүүр гарын 2-3 алчуур норгож хэд хэдэн газар дэлгэж тавихад үнэрийг нь шингээнэ. Тэрчлэн хэд хэдэн лаа зэрэг асаана. Эсвэл 5 хувийн формалины уусмалыг өрөөнд шүршиж бас болно.
Хүнсний зүйл хадгалж байгаа авдар шүүгээнд модны нүрс буталж хийсэн сав байрлуулна. Тэгэхдээ нүүрсээ байнга сольж байх хэрэгтэй. Модны нүүрс нь төрөл бүрийн үнэрийг шингээхийн хамт хүнсний зүйлийг муудахаас хамгаална.
Чемоданы доторхи эвгүй үнэрийг арилгахдаа цагаан цуутай чийгтэй алчуураар арчиж наранд хатаана.
Гараас сармисны үнэр салахгүй байвал кофены шаараар үрж арчина. Кофе байхгүй бол цайны шаараар арчиж болох юм. Сармис идсэний дараа амнаас эвгүй үнэр гарвал яншуй зажлан үнэрийг нь дарж болно. Мөн кофены үр, бохь зажилж болно.
Хөргөгчийн дотор эвгүй үнэртэй болчихвол тавиур бүрт нь зүсэм хар талх тавьж битүү хаагаад хэдэн цаг болгоно.
Талхны савны өвөрмөц үнэрийг арилгахадаа орос цуунд норгосон даавуугаар үе үе арчих ба тогтмол салхи оруулж байх хэрэгтэй.
Гал тогооны өрөөний эвгүй үнэрийг гаргахын тулд хайруулын тавганд бага зэрэг орос цуу хийж халаах /ууршихаас нь өмнө авна/ мөн жүрж, нимбэгний хуурай хальсыг шатааж болно.