Та хэдий чинээ уурлаж бухимдан өөрийгөө зовооно, таны мэдрэлийн эд эсүүд үхэж, хорогдож байдаг. Хүн бүр шахуу үүнийг мэддэг хэрнээ уурлаад байдаг.
Уур уцаар хараалын үг нь хэзээ ч хүнд сайн сайхан, амжилт бүтээлийг дагуулж байгаагүй. Мэдээжийн хэрэг хүн бүхэнд таагүй үйл явдал, ажил үйлсийн бүтэмжгүй байдал гээд л маш олон бухимдах зүйлс тулгардаг. Энэ бүхэнд хэрхэн биеэ барьж, өөрийгөө эвгүй байдалд оруулахгүй байх өөрийн гэсэн туршлага хүн бүрд байдаг. Та дотны найзаасаа хэцүү, уур бухимдалтай үедээ хэрхэн өөрийгөө тайвшруулдаг талаар асууж, зөвлөгөө авч болно шүү дээ.
Ямарваа нэгэн таагүй зүйлд таны сэтгэл бухимдаад байвал өөр зүйлийн тухай бодож түүнийгээ мартахыг хичээх хэрэгтэй. Эсвэл та хэн нэгэнд гомдсондоо бачуураад байвал тэр тухайгаа бусдад ярьж сэтгэлээ онгойлгоорой. Мөн бухимдсан үедээ тоо тоолж тайвширч болдог. Автобусанд олон хүнтэй үед таны гутал дээр хэн нэг нь гишгэчихвэл таны уур чинь хүрч тэр хүнийг бүдүүлэг тэнэгээр дуудаж хараадаг уу. Тэгвэл энэ нь танд ямар ч ашиггүй. Та олон хүний дунд өөрийгөө эвгүй байдалд оруулж, хэрүүл шуугиан тарихаас биш, тэр хүн таны гутлыг арчаад өгөхгүй нь лавтай. Тэгэхээр та шал дэмий зүйлд өөрийгөө зовоож эд эсээ үхүүлж байхаар огтхон ч тоохгүй өнгөрсөн нь хавьгүй дээр.
Өчүүхэн төдий зүйл дээр хэрүүл шуугиан тарьж, таарсан хүн бүрээ загнаж уцаарлаж явдаг хүн царай зүс муутай, үрчлгэр хөгшин харагддаг. Ийм хүмүүс бусдын дургүйцлийг хүргэж, хэн ч түүнд дуртай байдаггүй. Харин аливаа зүйлийг болж бүтэх талаас нь тайван хандаж, бусадтай инээд хөгжөөнтэй, эелдэг харьцдаг хүмүүс царай зүс өнгөлөг, сэтгэл булаам, бусдыг ямагт байлдан дагуулж байдаг. Ийм хүмүүс үеийнхнээсээ харьцангуй овор багатай, залуухан цоглог харагддаг байна. Ингээд танд зөвлөх зүйл бол битгий уурла. Уурласнаас хэзээ ч сайн сайхан болж, амжилт бүтээл аз жаргал ирдэггүй юм шүү.